Surxon davlat qoʻriqxonasida oʻrnatilgan “fotoqopqon” bir nechta yovvoyi hayvonlarni kamera obyektiga muhrladi. Ushbu suratlarda morxoʻr, jayra, toʻngʻiz, boʻri kabi hayvonlarni koʻrishimiz mumkin.
Surxondaryo viloyati Ekologiya va atrof-muhitni muhofaza qilish boshqarmasi axborot xizmatining maʼlum qilishicha, “fotoqopqon”ga tushgan hayvonlarning ichida morxoʻr eng antiqasi hisoblanadi. Morxoʻr butunlay yoʻq boʻlib ketish arafasida turgan kenja tur hisoblanadi. Shuning uchun ham u “Qizil kitob”ga kiritilgan. Morxoʻr Koʻhitang, Boysuntogʻ, Bobotogʻ togʻ tizmalarida tarqalgan. 1950–1970-yillarda keskin kamayib ketgan. Keyinchalik Surxon qoʻriqxonasida olib borilgan muhofaza choralari tufayli ushbu turning soni asta-sekin barqarorlashgan. Biroq, boshqa hududlarda qisqarishda davom etmoqda. Oʻzbekistonda taxminan 400–450 bosh morxoʻr mavjud, deb taxmin qilinadi.
