Faqat buning uchun 4-may tongida Las-Vegasda boʻlib oʻtadigan boks oqshomida Inoue amerikalik Ramon Kardenasni, Ahmadaliyev esa hozircha nomaʼlum boʻlgan raqibini yengishi talab etiladi.
Murodjonning menejeri Vadim Kornilovning soʻzlariga koʻra, Inoue — Ahmadaliyev jangi 14-sentyabr sanasida Yaponiya poytaxti Tokio shahrida oʻtkazilishi rejalashtirilyapti.
Avvalroq, charm qoʻlqop ustamiz Naoyaga murojaat qilib, istagalgan joyda, hatto raqibining vatanida ham jang oʻtkazishga tayyorligini aytgandi.
Britaniyalik taniqli promouter Eddi Xirn ham jang haqidagi xabarni tasdiqladi.
“Biz Ahmadaliyev—Inoue jangi boʻyicha muzokaralarni deyarli yakunladik. Jangning sentyabr oyida oʻtkazilishi boʻyicha kelishuvga erishdik. Biz rozi boʻlgan taqdirdagina Inoue — Kardenas jangi mutlaq jahon chempionligi maqomida boʻladi. Chunki, Naoya navbatdagi jangini Ahmadaliyevga qarshi oʻtkazishi shart. WBA uning zimmasiga ana shu majburiyatni qoʻygan. Agar jangdan qochsa, WBA chempionlik kamaridan mahrum etiladi. Biz yaponiyalik bokschiga shu holatda ham imkoniyat beryapmiz. Sentyabrda Murodjonga qarshi ringga chiqish sharti evaziga Kardenas bilan jang qilishiga ruxsat beryapmiz. Bu boʻyicha uning promouteri Xonda bilan ham kelishib oldik. Inoue — Ahmadaliyev jangi sentyabr oyida Yaponiyada oʻtkaziladi. Tez kunda jang boʻyicha rasman shartnoma imzolaymiz“, — deya Xirnning soʻzlarini keltirmoqda BoxingScene.
