“Oʻzbekiston Respublikasi davlat mustaqilligining oʻttiz toʻrt yillik bayramiga tayyorgarlik koʻrish va uni oʻtkazish toʻgʻrisida”gi Prezident qarori (PQ–222-son, 10.07.2025-y.) qabul qilindi.
Qarorga koʻra, milliy istiqlolimizning 34-yillik shonli sanasi Yangi Oʻzbekistonning taraqqiyot darajasi, jahon maydonidagi obroʻ-eʼtiboriga har tomonlama munosib tarzda, yuksak saviyada nishonlanadi.
Mustaqillikning 34-yilligiga bagʻishlangan bayram tadbirlari “Vatan uchun, millat uchun, xalq uchun!” degan ezgu gʻoyani oʻzida mujassam etgan holda oʻtkaziladi.
Mustaqillik bayrami Qoraqalpogʻiston Respublikasi, viloyatlar markazlari va Toshkent shahrida, shuningdek, barcha shahar hamda tumanlar, qishloq va ovullarda munosib nishonlanishi taʼminlanadi.
“Ona diyor – ranglar jilosida”, “Vatan uchun yashaylik!”, “Eng ulugʻ, eng aziz” kabi anʼanaviy koʻrik-tanlovlar yuqori darajada oʻtkaziladi.
