Ikkinchi eng yengil vazn toifasida yaponiyalik mutlaq jahon chempioni Naoya Inouening kelgusi rejalari boʻyicha maʼlumot berildi.
Top Rank promouterlik kompaniyasi rahbari, Inouening promouteri Bob Arumning soʻzlariga koʻra, Naoya 24-yanvar kuni Sem Gudman bilan jang qilganidan soʻng, may yoki iyun oyida Las-Vegas (AQSH) shahrida WBC kamarini Alan Pikassodan himoya qiladi.
Arumning aytishicha, shundan soʻng navbat Murodjon Ahmadaliyev bilan jangga yetib keladi. Oʻzbekistonlik sobiq jahon chempioni bilan bahs shu yil oxirida yoki 2026-yil boshida Saudiya Arabistonida oʻtkazilishi rejalashtirilgan.
Avvalroq, yaponiyalik charm qoʻlqop ustasi WBA Interim chempioni Murodjon Ahmadaliyevga: «Agar jang qilishni istasang, gʻalabangni «qiymatini« ushlab tur va kut«, deya murojaat qilgandi. WBA tashkiloti mazkur jangga hozirga qadar ikki marotaba buyruq bergan.
