“AQSh va Ukraina jamoalari Qora dengizda o't ochishni to'xtatish va energetika infratuzilmasiga hujumlarni 30 kunga to'xtatishni muhokama qilish uchun Ar-Riyodda muzokaralarning navbatdagi bosqichini o'tkazmoqda”, deyiladi nashr xabarida.

AFP xabariga ko'ra, tomonlar seshanba kuni Saudiya Arabistonida muzokaralarning yangi bosqichini boshlagan.

AQSh va Ukraina vakillari o'rtasidagi muzokaralarning oldingi raundi Ar-Riyodda yakshanba kuni bo'lib o'tgan edi.

Bir kun avval u yerda Moskva va Vashingtonning “texnik guruhlari”ning ekspertlar yig'ilishi bo'lib o'tdi. Rossiya tomonidan Federatsiya Kengashi xalqaro qo'mitasi rahbari Grigoriy Karasin va FSB direktori maslahatchisi Sergey Beseda ishtirok etdi.

Kremlda ta'kidlanganidek, asosiy mavzu Vladimir Putin va Donald Tramp o'rtasidagi so'nggi telefon suhbatida muhokama qilingan Qora dengiz tashabbusi bo'ldi.

Uchrashuvdan so'ng Karasin RIA Novosti agentligiga Amerika delegatsiyasi bilan muzokaralar qiyin, ammo konstruktiv o'tganini aytdi. Ukraina bo'yicha muloqot haqida gapirar ekan, u pozitsiyalar har doim ham mos kelmayotganini, biroq tomonlar o'zaro hamkorlik shaklini izlashini ta'kidladi – bunday imkoniyat paydo bo'ldi. Shu bilan birga, Moskva va Vashington Ukraina inqirozi bilan bog'liq masalalarda hamkorlik qilish zarurligini tushunadi.

Karasin, shuningdek, Rossiya va AQSh ekspert guruhlari o'rtasidagi muzokaralar davom etishi mumkinligi haqida fikr bildirdi.

Muzokaralar yakunlari bo'yicha tomonlarning qo'shma bayonoti seshanba kuni e'lon qilinadi, deb xabar qildi RIA Novosti manbasi.

Ikki davlat rahbarlari o'rtasidagi suhbat 18-mart kuni bo'lib o'tgandi. Ular Ukraina mojarosini tartibga solish masalalariga to'xtalib, dunyoda xavfsizlik va barqarorlikni ta'minlashda o'zlarining alohida mas'uliyatini hisobga olgan holda munosabatlarni normallashtirishdan o'zaro manfaatdorlik bildirishdi. Rossiya Prezidenti 30 kun davomida energetika infratuzilmasi obyektlariga hujum qilishdan o'zaro voz kechish g'oyasiga ijobiy javob berdi va harbiylarga tegishli buyruq berdi.

Davlat rahbarlari, shuningdek, “Qora dengizda o't ochishni to'xtatish, to'liq o't ochishni to'xtatish va doimiy tinchlik”ni joriy etish bo'yicha texnik muzokaralarni boshlashga kelishib olishdi, deb xabar beradi ria.ru.