“Oboronlogistika” 2024-yil 23-dekabrda kompaniyaga tegishli “Ursa Mayor” kemasida maqsadli terakt sodir etilgan deb hisoblaydi. Kema ekipaji a'zolarining ko'rsatmalariga ko'ra, 2024-yil 23-dekabr kuni 13:50 da (Moskva vaqti bilan) orqa tomondagi bortning o'ng tomonida ketma-ket uch marta portlash sodir bo'ldi”, deyiladi matbuot xizmati xabarida.

Shundan so'ng, yuk kemasi chap tomonga 25 darajagacha keskin darajada og'di, bu kemaga suv kirib qolganini ko'rsatadi.

“Ursa Mayor” kemasiga ortiqcha yuk yuklanmagan, deya ta'kidladi kompaniya. “Oboronlogistika” ma'lumotlariga ko'ra, bu Rossiyadagi eng yirik yuk kemalaridan biri bo'lib, uning maksimal yuk ko'tarish quvvati – 9,5 ming tonna. Unga ortilgan yukning og'irligi 806 tonnani tashkil etgan.

Bortda: ikkita portal krani, ikkita kran kovshi, ikkita kemada ishlatiladigan qopqoq, qopqoqlar uchun uskunalar bilan jihozlangan 20 futlik konteyner va 129 ta bo'sh konteyner bo'lgan.

“Ursa Mayor” – 2009-yilda ishlab chiqarilgan yuk kemasi. U Rossiya bayrog'i ostida Sankt-Peterburgdan Vladivostokka yo'l olgan. O'rta yer dengizida yuk kemasi halokatga uchradi, 14 nafar ekipaj a'zosi qutqarib olinib, Kartaxena bandargohiga yetkazildi, ikki nafari bedarak yo'qolganlar ro'yxatida. Kema Ispaniya qirg'oqlaridan 67 milya, Jazoir qirg'oqlaridan 45 milya uzoqlikda cho'kib ketdi, deb xabar beradi ria.ru.