Chunki xodimlar oʻz kasbini yanada mukammal oʻrganishni istaydi.
Samarqand agroinnovatsiyalar va tadqiqotlar institutida Yevropa Ittifoqining “Erasmus+” dasturi tomonidan moliyalashtirilgan Oziq-ovqat innovasiyalari boʻyicha ochiq universitet loyihasi aynan shu maqsadda yoʻlga qoʻyilgan. 2024-yil fevralda boshlangan loyihada Yevropa Ittifoqi mamlakatlaridan ikkita, Tojikistondan uchta, Oʻzbekistondan esa ikkita oliy taʼlim muassasasi ishtirok etyapti.
Uni amalga oshirishdan maqsad Markaziy Osiyo universitetlarida oziq-ovqatni qayta ishlash texnologiyasi yoʻnalishi boʻyicha kunduzgi taʼlim shaklida oʻqiyotgan talabalar bilan birga tashqi talabalar ishtirok etadigan taʼlimning yangi shaklini ishlab chiqish va joriy qilishdan iborat.
Loyiha doirasida Yevropa Ittifoqidagi yetakchi universitetlarning malakali professor-oʻqituvchilari ishtirokida oziq-ovqatni qayta ishlash texnologiyalari taʼlim yoʻnalishiga oid 7 ta yangi oʻquv rejasi hamda modullari ishlab chiqildi. Besh professor-oʻqituvchimiz Latviyaga malaka oshirishga yuborildi. Malaka oshirish davomida ular sut, goʻsht, meva-sabzavot va donni qayta ishlash texnologiyasi hamda yangi oziq-ovqat mahsulotlarini ishlab chiqish kabi oltita fan modulini chuqur oʻrganib qaytdi. Bundan tashqari, oziq-ovqat sifati va xavfsizligi boʻyicha 4 professor-oʻqituvchimiz Slovakiyaning Nitra qishloq xoʻjaligi universitetida malaka oshirishga yuborildi.
2025/2026 oʻquv yilidan institutimizda “Don mahsulotlarini qayta ishlash texnologiyasi” hamda “Akademik matn” fan modullari boʻyicha sinov tariqasida oʻqitish jarayoni boshlangan. Ochiq taʼlim shaklidagi ushbu mashgʻulotlarda bakalavriat va magistratura bosqichi talabalari, professor-oʻqituvchilar, oziq-ovqat sanoati korxonalari vakillari, jumladan, “Agromir” va “Meva-Maroqand” MCHJ xodimlari, turli oliy taʼlim muassasalari tadqiqotchilari ishtirok etmoqda.
Darslar sifatini yanada oshirish maqsadida joriy yil oktyabrda Latviya hayot fanlari va texnologiyalari universiteti hamda Slovakiyaning Nitra qishloq xoʻjaligi universitetidan mutaxassislar kelib, talaba va tinglovchilarga nazariy hamda amaliy bilim berdi. Muhimi, mazkur oʻqitish modeli oziq-ovqat sanoatida faoliyat yuritayotgan mutaxassislar malakasini oshirish, mehnat bozoridagi raqobatbardoshligini kuchaytirish bilan birga talabalarning amaliy koʻnikmalarni chuqurroq egallashiga koʻmaklashmoqda.
Loyiha doirasida institutda “Don mahsulotlarini qayta ishlash texnologiyasi” fan modulini oʻqitish uchun zamonaviy laboratoriya jihozlari, yaʼni qolipli non pishirish pechlari oʻrnatildi.
“Ochiq universitet” loyihasi doirasida kerakli fan moduli oʻqitib boʻlinganidan keyin tinglovchilarga sertifikat beriladi. Hozircha korxona va tashkilotlardan 12 talabgor ushbu loyiha boʻyicha oʻqidi, yaʼni kasbiga doir sirlarni chuqur oʻrgandi. Bu tamoyil asosida kasb oʻrganmoqchi boʻlgan talabgorlarni kelgusida ham oʻqitish, ularning mehnat bozorida yetuk mutaxassis boʻlib yetishishiga koʻmaklashish niyatidamiz.
Shavkat HASANOV,
Samarqand agroinnovatsiyalar va
tadqiqotlar instituti rektori, professor
