Toshkent viloyatida tezkor tadbir davomida Ohangaron tuman hokimligi bosh yuriskonsulti ashyoviy dalillar bilan qoʻlga olindi.
Bu haqda Davlat xavfsizlik xizmati xabar qildi.
Maʼlum boʻlishicha, u “Eyvalek” mahalla fuqarolar yigʻini hududida joylashgan, hokimlik balansidagi xonadonni yuqori lavozimdagi tanishlari orqali fuqaro nomiga rasmiylashtirib berish evaziga 1500 AQSH dollari soʻragan. Bosh yuriskonsult pora pulini olgan vaqtida qoʻlga olindi.
Taʼkidlanishicha, u avval ham bir necha marotaba sudlangan boʻlishiga qaramasdan, xulosa chiqarmagan.
Hozirda ushbu holat yuzasidan Jinoyat kodeksining 168-moddasi 3-qismi “v” bandi va 28, 211-moddasi 1-qismi bilan jinoyat ishi qoʻzgʻatilib, tergov harakatlari olib borilmoqda.
