Tadbir avvalida universitet hovlisidagi “Do‘stlik bog‘i”da buyuk mutafakkir Alisher Navoiy haykali poyiga sakura ko‘chati ekildi. Ushbu ezgu an’ana Yaponiya va  O‘zbekiston do‘stligini tamsil etish barobarida Navoiy ijodiga mehr qo’ygan, Soka universiteti asoschisi, tinchlik va insonparvarlik g‘oyalari targ‘ibotchisi doktor Daysaku Ikeda  xotirasiga bag‘ishlandi.
Shundan so’ng universitet foyesida “Olam ichra tanho – Navoiy” nomli fotoko‘rgazmaning ochilish marosimi bo‘lib o‘tdi. Unda Daysaku Ikeda tomonidan chekilgan noyob fotosuratlar namoyish etildi. Delegatsiya tomonidan ToshDO‘TAUga 35 ta maxsus tarixiy suratlar tuhfa qilindi.
Universitet anjumanlar zalida davom etgan uchrashuvda doktor Daysaku Ikedaning hayoti va faoliyatiga bag‘ishlangan videorolik namoyish etildi. So‘ng universitet rektori akademik Shuhrat Sirojiddinov, Soka universiteti prezidenti professor Sudzuki, delegatsiya rahbari doktor Yoshiyuki Nagaoka hamda O‘zbekiston Respublikasi Madaniy meros agentligi rahbariyati vakillari so‘zga chiqib, Navoiyning insonparvarlik va bag‘rikenglik g‘oyalari bilan Ikeda ilgari surgan tinchlik falsafasi o‘rtasidagi mushtaraklikni ta’kidladilar.
Tadbir yakunida ToshDO‘TAU talabalari tomonidan tayyorlangan ijodiy dastur mehmonlarga namoyish etildi.
Mazkur uchrashuv buyuk ajdodimiz Alisher Navoiyning “yor o‘ling bir-biringizga” degan hikmatli da’vati va doktor Daysaku Ikedaning tinchlik yo‘lidagi amaliy faoliyati o‘rtasidagi uyg‘unlikni yana bir bor namoyon etdi hamda O‘zbekiston va Yaponiyaning ta’lim va madaniyat sohalaridagi hamkorligini mustahkamlashga xizmat qildi.