Tadbirda OAV vakillari, gazeta va jurnallar bosh muharrirlari, mazkur kitobdan materiallari joy olgan ustoz jurnalistlar, media soha yoʻnalishida taʼlim olayotgan talabalar ishtirok etdi.
Taqdimotni Oʻzbekiston Jurnalistlar uyushmasi raisi v.b. Xolmurod Salimov kirish soʻzi bilan ochdi va tadbirni olib bordi. U davlatimiz rahbari Shavkat Mirziyoyevning 2022-yil 27-iyundagi “Ommaviy axborot vositalarini qoʻllab-quvvatlash va jurnalistika sohasini rivojlantirish chora-tadbirlari toʻgʻrisida”gi qarorida belgilangan vazifalar ijrosi doirasida Uyushma tomonidan ming nusxada chop etilgan «Oltin qalamli jurnalistlar» kitobini nashrga tayyorlash jarayonlari haqida batafsil maʼlumot berarkan, kitobga 50 nafarga yaqin ustoz jurnalistlarning publitsistika, jurnalistik surishtiruv, ocherk, felyeton kabi 8 ta janr boʻyicha eng sara materiallari kiritilganini aytib oʻtdi. Shuningdek, kitobdan taniqli fotojurnalist Abdugʻani Jumaning “Fotojurnalist mahorati” nomli maqolasi bilan birga 9 nafar mahoratli fotojurnalistning turli rakurslardan olingan 70 ga yaqin fotomateriallari ham oʻrin olganini taʼkidladi.
Tadbirda ustoz jurnalist va adib Xurshid Doʻstmuhammad, “Yangi Oʻzbekiston” va “Pravda vostoka” gazetalari bosh muharriri Salim Doniyorov, “Ishonch” va “Ishonch-Doveriye” gazetalari bosh muharriri, senator Husan Ermatov, “Hurriyat” gazetasi bosh muharriri Abdurasul Jumaqulov va boshqalar jurnalistikada ijodiy uslubga ega boʻlish, doimiy ravishda kasbiy mahoratni oshirib borish muhim ekanligi, shu maʼnoda “Oltin qalamli jurnalistlar” kitobi media sohani tanlaganlar, umuman, ijodkorlarga bu borada zarur manba-qoʻllanma sifatida xizmat qilishini eʼtirof etdilar.
Maʼlum qilinganidek, ming nusxada chop etilgan “Oltin qalamli jurnalistlar” kitobi respublikamizning barcha viloyat va tumanlarida faoliyat olib borayotgan OAV tahririyatlari, jurnalistika yoʻnalishida kadrlar tayyorlaydigan oliy taʼlim muassasalari, Uyushmaning hududiy boʻlimlari qoshida ochilgan mahorat maktablari hamda “Yosh jurnalistlar” toʻgaraklariga bepul tarqatiladi. Kelgusida esa har yili “Oltin qalamli jurnalistlar” seriyasi ostida bunday kitoblarni koʻproq adadda nashr etib borish yoʻlga qoʻyiladi.
Taqdimotda barcha ishtirokchilarga “Oltin qalamli jurnalistlar” kitobi sovgʻa qilindi.
