Tashrif davomida OFK prezidentiga tashkilot Bosh kotibi Datuk Seri Vindsor Jon, Bosh kotib oʻrinbosari Vohid Kardani, shuningdek, bir nechta masʼul vakillar hamrohlik qilishadi.
Mehmonlarni Islom Karimov nomidagi Toshkent xalqaro aeroportida Oʻzbekiston Respublikasi sportni rivojlantirish vaziri Adham Ikromov, OʻFA birinchi vitse-prezidenti Ravshan Ermatov va MOQ Bosh kotibi Oybek Qosimovlar kutib olishdi.
Eslatib oʻtamiz, joriy yilning iyun oyida Toshkent va Qarshi shaharlarida 23 yoshgacha boʻlgan futbolchilar oʻrtasidagi Osiyo chempionati oʻtkaziladi. Osiyo futbol konfederatsiyasi prezidenti mazkur tadbirga tayyorgarlik jarayoni bilan yaqindan tanishadi. Shuningdek, jarayonda mamlakatimizda futbolni yanada rivojlantirishga oid masalalar ham muhokama qilinishi koʻzda tutilgan.
Shundan soʻng rasmiylar MOQga tashrif buyurdilar. Unda oʻzaro hamkorlik aloqalarini yanada rivojlantirish mavzusida uchrashuv oʻtkazildi. Yigʻilishda MOQ raisi oʻrinbosari Sherzod Tashmatov ham ishtirok etdi.
Suhbatda Adham Ikramov OFK rahbarini mamlakatimizda futbol ommaviyligini oshirish boʻyicha olib borilayotgan ishlar bilan yaqindan tanishtirdi.
“Siz kabi faxriy mehmonlarni qabul qilish biz uchun sharaf. Mamlakatimiz va OFK oʻrtasidagi doʻstona aloqalar yildan yilga mustahkamlanib bormoqda. Sir emaski, futbol yoshlarimiz orasidagi eng sevimli sport turlaridan. Sportni rivojlantirish vazirligi, MOQ va OʻFA yurtimizda futbolni yanada rivojlantirish, uning ommaviyligini oshirish boʻyicha hamkorlikda faoliyat yuritmoqda. Hozir Assotsiatsiyamizda kuchli jamoa shakllandi. Ular futbol ommaviyligini mahallalardan boshlab tatbiq qilmoqda. Bu seleksiya ishlariga ham yordam beradi. Mamlakatimizda futbolni rivojlantirishga shaxsan Prezidentimizning oʻzlari eʼtibor qaratmoqdalar”, – dedi Sportni rivojlantirish vaziri.
Oʻz navbatida, OFK prezidenti ham bu borada olib borilayotgan oʻzgarishlar oʻzining ijobiy samarasini berayotganini taʼkidladi.
“Men va jamoamni iliq kutib olganingiz uchun tashakkur bildiramiz. Oʻzbekistonga qilgan soʻnggi tashrifim va hozirgi holatni solishtirsak, davlatingizda har tomonlama katta oʻsishni koʻrish mumkin. Haqiqatdan ham, OʻFAda kuchli jamoa tuzilib, samarali faoliyat olib bormoqda. OFK Oʻzbekistonga shunchaki aʼzosi emas, oʻzining eng yaqin hamkorlaridan biri sifatida qaraydi. Mamlakatingizda futbolni yanada rivojlantirish yoʻlida mana shunday ishlashda davom etsak, koʻp natijalarga erishamiz. Buning uchun Oʻzbekistonda yaxshi infratuzilma mavjud”, – dedi Shayx Salmon bin Ibrohim al Xalifa.
Suhbat davomida Toshkentda 23 yoshgacha boʻlgan futbolchilar oʻrtasidagi Osiyo chempionatini yuqori saviyada oʻtkazish, mamlakatimizda murabbiylik, hakamlik sohalarida malakali kadrlarni tayyorlash, futbol ommaviyligini oshirish mavzularida fikr almashildi. Uchrashuv yakunida martabali mehmon MOQning Faxriy mehmonlar kitobiga oʻzining samimiy tilaklarini yozib qoldirdi. Shundan soʻng Shayx Salmon bin Ibrohim al Xalifa MOQ qoshidagi Respublika sport tibbiyoti ilmiy-amalik markazining faoliyati bilan tanishdi.
