O'zbekiston chorakfinalga peshqadam sifatida yo'l oldi

    Sport 23 Aprel 2024 525

    Qatarda davom etayotgan Osiyo kubogi U23 guruh bosqich bahslariga yakun yasaldi.

    O'zbekiston olimpiya jamoasi 3 o'yinda 3 g'alabaga erishib, +10 to'plar nisbati bilan pley-offga guruh peshqadami sifatida yo'l oldi. Temur Kapadze shogirdlari 1/4 finalda Osiyoning amaldagi chempioni Saudiya Arabistoniga qarshi saf tortadi.

    Dohadagi «Khalifa International» stadionida o'tgan 3-tur o'yinigacha O'zbekiston va Vetnam 6 ochkodan jamg'arib, keyingi bosqich masalasini muddatdan avval hal qilgan bo'lsa-da, bu peshqadam va 2-o'rin sohibini aniqlab berishi kerak edi. Guruh g'olibini Saudiya Arabistoni kutayotgan bo'lsa, 2-o'rindagi jamoani esa Iroq kutayotgan edi.

    Vetnamga qarshi uchrashuv oldidan olimpiya jamoamizning etakchilari Abbosbek Fayzullaev va Abduqodir Husanov klubi safidan Qatarga etib kelishdi. Kapadze Husanovni asosiy tarkibga tushirgan bo'lsa, Fayzullaevni zaxiradan maydonga tushirishga qaror qildi.

    Shunga qaramay, Kapadze shogirdlari Alisher Odilovning dubli va Ruslanbek Jiyanovning goli evaziga birinchi bo'limdayoq o'yin taqdirini hal qilishdi – 3:0. Ikkinchi bo'lim esa chorakfinal uchun tayyorgarlik vazifasini o'tab berdi.

    Shu tariqa, O'zbekiston guruh bosqichida 10ta gol urib, to'p o'tkazmay, D guruhi g'olibi sifatida 1-o'rinni egalladi va C guruhida 2-o'rinni egallagan Saudiya Arabistoniga qarshi 26 aprel kuni chorakfinalda o'ynaydigan bo'ldi. Vetnam esa shu kuni C guruhi g'olibi Iroq bilan yarimfinal yo'llanmasi uchun kurashadi.

    Osiyo kubogi U23. 23 aprel

    3-tur. D guruhi

    O'zbekiston U23 – Vetnam U23 – 3:0

    Gollar: Alisher Odilov 4, 40, Ruslanbek Jiyanov 36.

    O'zbekiston: 1. Abduvohid Ne'matov, 2.Saidazamat Mirsaidov, 4. Abduqodir Husanov, 5. Muhammadqodir Hamraliev (Asadbek Rahimjonov, 46), 6. Ibrohimxalil Yo'ldoshev, 8. Ibrohim Ibragimov, 10. Jasur Jaloliddinov (Diyor Xolmatov, 46), 11. Otabek Jo'raqo'ziev (14.Abbosbek Fayzullaev, 70), 15. Umarali Rahmonaliev, 20. Ruslanbek Jiyanov (Hojimat erkinov, 65), 22. Alisher Odilov (Husayn Norchaev, 78).

    Vetnam: 13. Nguen Anviet, 2. Nguen Xon, 3. Tran Kuang, 4. Luong Duy, 7.Xoang Van, 8. Nguen Duk, 10. Vo Nguen, 17. Nguen Duk, 19. Nguen Tai, 20. Nguen Ngok, 22.Nguen Kuang.

    Kuvayt – Malayziya 2:1