Prezident taʼlim muassasalari agentligi maʼlumotiga koʻra, kecha poytaxtimizdagi “Yangi Oʻzbekiston” majmuasida Xalqaro Mendeleyev kimyo olimpiadasi gʻolib va sovrindorlarini taqdirlashga bagʻishlangan tantanali tadbir boʻlib oʻtdi.
Tantanali marosimda Oʻzbekiston Prezidentining yoshlar, fan, taʼlim, sogʻliqni saqlash, madaniyat va sport masalalari boʻyicha maslahatchisi Abdujabbor Abduvohidov 56-Xalqaro Mendeleyev olimpiadasi doirasida dunyoning 16 mamlakatidan iqtidorli yoshlar hamda kimyo ilmining eng yirik namoyandalari Oʻzbekistonga tashrif buyurganini, bu tom maʼnoda maʼrifat va bilimlar bayramiga aylanganini taʼkidladi.
Prezident taʼlim muassasalari agentligi direktori Hilola Umarova navbatdagi Xalqaro Mendeleyev olimpiadasining yurtimizda oʻtkazilishi mamlakatimiz tarixida alohida iz qoldirganini taʼkidladi. Azaldan maʼrifatga beshik boʻlgan yurtimiz bugun yana bir bor ilm ahlini birlashtirdi.
Oʻtgan bir hafta davomida turli mamlakatlardan tashrif buyurgan 100 nafarga yaqin isteʼdodlar nafaqat oʻzaro kuch sinashishdi, balki bilim va tajribalarini oshirishib, yangi doʻstlar orttirishdi. Buyuk Ipak yoʻli chorrahasida joylashgan Toshkent, Samarqanddagi qutlugʻ qadamjolarni ziyorat qildilar.
– Bu yilgi medal sohiblari orasida beshta davlat vakili bor, – dedi Xalqaro Mendeleyev kimyo olimpiadasi tashkiliy qoʻmitasining raisi, Moskva davlat universiteti kimyo fakulteti dekani Stepan Kalmikov. – Qolaversa, anʼanaviy tarzda kuchli natija koʻrsatayotgan jamoalar ham, oltin medal sohiblari orasida yangi kelganlar ham bor. Ayniqsa, Oʻzbekiston terma jamoasini tabriklashni istar edim. Ayni paytda mamlakatda taʼlim sohasida katta islohotlar amalga oshirilmoqda.
Xalqaro olimpiadaning koʻplab ishtirokchilari oltin, kumush, bronza medallari, maxsus diplomlar, sertifikatlar bilan taqdirlandilar.
Xalqaro olimpiadaning 10 nafar ishtirokchisi - rossiyalik 5 nafar oʻquvchi, Turkiya, Isroil, Belarusdan bir nafardan oʻquvchi oltin medalga munosib topildi. Ular orasida Oʻzbekistondan Prezident taʼlim muassasalari agentligi tizimidagi Abu Ali ibn Sino nomidagi ixtisoslashtirilgan maktab oʻquvchisi Azimjon Jamolov ham birinchi oʻringa loyiq topildi. Olimpiadaning mutlaq gʻolibligiga hamda Rossiya Fanlar akademiyasi akademigi Valeriy Lunin nomidagi maxsus pul mukofotiga rossiyalik Ignatiy Tarabrin munosib topildi.
Olimpiada Oʻzbekiston terma jamoasi jami 10 ta medalni (1ta oltin, 4 ta kumush va 5 ta bronza) qoʻlga kiritdi.
