Muzokaralarda rasmiy delegatsiyalar aʼzolari, ikki mamlakat vazirliklari va yirik kompaniyalari, chegaradosh viloyatlar rahbarlari ishtirok etdi.
Oʻzbekiston va Tojikiston yetakchilarining siyosiy irodasi va birgalikdagi saʼy-harakatlari tufayli birodar mamlakatlarning munosabatlari teng huquqli va oʻzaro manfaatli amaliy hamkorlikning sifat jihatidan yangi darajasiga koʻtarilgani qayd etildi.
- Birgalikdagi saʼy-harakatlar bilan beqiyos ishlarni amalga oshirdik va ular oʻzaro munosabatlarimiz solnomasidan oʻrin oldi, - deb taʼkidladi Shavkat Mirziyoyev.
Tomonlar strategik sheriklikni kengaytirishda qatʼtiy ekani va bu borada aniq choralarni koʻrishga tayyorligini taʼkidladilar.
Muzokaralarda savdo-iqtisodiy hamkorlikni yana-da kengaytirish, sanoat kooperatsiyasini chuqurlashtirish, transport sohasidagi va hududlar oʻrtasidagi sheriklikni rivojlantirish, energetika yoʻnalishidagi ulkan salohiyatni samarali ishga solish, madaniy-gumanitar almashinuvlarni davom ettirish, zamonaviy tahdid va xatarlarga qarshi kurashish boʻyicha hamkorlikni mustahkamlash masalalariga alohida eʼtibor qaratildi.
Prezident Shavkat Mirziyoyev tovar ayirboshlashdagi ijobiy surʼatga qaramay, kelgusi yilda uni ikki barobarga koʻpaytirish uchun yangi “oʻsish nuqtalari”ni topish muhim ekanini aytdi. Shu maqsadda erkin savdo rejimidan istisnolarni bekor qilish va notarif toʻsiqlarni bartaraf etish masalalarini kelishishni tez fursatda yakunlash muhim, deb taʼkidladi davlatimiz rahbari.
Oʻzaro tovar yetkazib berish hajmini oshirish va nomenklaturasini kengaytirish, uchinchi mamlakatlarga birgalikda chiqish imkoniyatlarini izlash lozim.
Davlatimiz rahbari Oʻzbekiston mamlakatlarimiz hududlari va yetakchi korxonalarining sanoat kooperatsiyasini kengaytirishdan manfaatdorligini taʼkidladi.
- Muvaffaqiyatli hamkorlikning real misollari va istiqbolga moʻljallangan aniq rejalarimiz bor.
Bu haqda soʻz yuritganda, Oʻzbekiston avtomobillarini yigʻishni tashkil etish, zamonaviy transformatorlar va qishloq xoʻjaligi uskunalarini ishlab chiqarish, maishiy texnika va qurilish materiallari, kalava ip va toʻqimachilik mahsulotlari ishlab chiqarishni kengaytirish, mamlakatlarimizdagi boshqa qoʻshma loyihalarni tilga olish lozim, - dedi Shavkat Mirziyoyev.
Shu munosabat bilan tashkil etilgan qoʻshma investitsiya kompaniyasi faoliyatini ilgʻor xorijiy tajriba asosida samarali yoʻlga qoʻyish hamda uning imkoniyatlaridan loyihalarni ilgari surishda maksimal darajada foydalanish zarur.
Transport va tranzit tashishlar sohasidagi hamkorlik ham strategik yoʻnalishdir. Oʻzbekiston Prezidenti mamlakatlarimiz tranzit salohiyatidan samarali foydalanish, shaharlar oʻrtasidagi havo qatnovlarini kengaytirish va avtobus qatnovlarini tiklashni taklif etdi.
Shavkat Mirziyoyev ikki mamlakat viloyatlari va tumanlari kesimida toʻgʻridan-toʻgʻri tizimli muloqotni yoʻlga qoʻyish muhim ekanini taʼkidladi.
Kuni kecha Xatlon viloyatining Boxtar shahrida oʻtgan birinchi Hududlararo forum bunday shakldagi hamkorlikning samaradorligini yana bir bor isbotladi.
- Masalalarni tezkor hal qilish uchun hududlar rahbarlari izchil “harakatlar rejalari”ni kelishib olishlari va har oy kamida bir marta joylarda uchrashuvlar oʻtkazib borishlari lozim, - deb qayd etdi davlatimiz rahbari.
Ikki mamlakatning ulkan gidroenergetika salohiyatidan samarali foydalanish va suvdan foydalanish masalalari boʻyicha konstruktiv va oʻzaro manfaatli muloqotni davom ettirish masalalari muhokama qilindi.
Yetakchilar anʼanaviy faol gumanitar almashinuvlarni davom ettirishga kelishib oldilar. Davlatimiz rahbari diplomatik munosabatlarimiz oʻrnatilganining 30 yilligiga bagʻishlangan qoʻshma madaniy tadbirlar dasturini amalga oshirish, shuningdek, ikki mamlakat yoshlari festivalini tashkil etish, Dushanbe va Toshkentda zamonaviy oʻzbek va tojik adabiyotining tanlangan asarlari - antologiyalarini nashr etishni taklif etdi.
Muzokaralarda zamonaviy xatar va tahdidlarga qarshi kurashish sohasida, ayniqsa Afgʻonistonda yuzaga kelayotgan vaziyat asnosida hamkorlikni kuchaytirish muhim ekani qayd etildi.
Oʻzbekiston va Tojikiston Afgʻoniston boʻyicha tinchlik muzokaralarini qoʻllab-quvvatlash, ushbu mamlakatni ijtimoiy-iqtisodiy rivojlantirishga qaratilgan loyiha va dasturlarni amalga oshirish, uni mintaqaviy iqtisodiy sheriklikka faol jalb etish tarafdori ekani taʼkidlandi.
Tomonlar BMT, MDH, SHHT, Islom hamkorlik tashkiloti, Iqtisodiy hamkorlik tashkiloti, Orolni qutqarish xalqaro jamgʻarmasi kabi xalqaro va mintaqaviy tuzilmalar doirasida hamkorlikni davom ettirish va bir birini qoʻllab-quvvatlashga tayyor ekanini tasdiqladilar.
Prezident Emomali Rahmon Tojikiston birodar Oʻzbekiston bilan hamkorlikda erishilgan bugungi yuksak darajani qadrlashini, bunda Prezident Shavkat Mirziyoyevning katta hissasi borligini alohida taʼkidladi. Muzokaralar chogʻida kelgusi ishlar uchun rejalar belgilab olingani, ularning natijalari ikki mamlakat strategik sheriklik munosabatlarini yana-da kengaytirish uchun yangi omil boʻlib xizmat qilishini qayd etdi.
