Ikki mamlakat aviatsiya maʼmuriyatlari oʻrtasida oʻtkazilgan muzokaralarda parvozlar geografiyasi hamda chastotasini bir necha barobarga oshirish boʻyicha kelishuv imzolandi.

Ushbu kelishuvga koʻra Toshkent va Samarqand aeroportlari bilan bir qatorda viloyatlardagi barcha xalqaro aeroportlardan BAAning Dubay, Abu-Dabi, Sharja, shuningdek, Ras al-Hayma va Fujayra shaharlariga ham parvozlar amalga oshiriladi.

Erishilgan kelishuvga koʻra har ikki davlatlarning tayinlangan aviakompaniyalari:

Toshkent – Abu-Dabi, Samarqand – Abu-Dabi, Urganch – Abu-Dabi, Buxoro – Abu-Dabi, Namangan – Abu-Dabi, Fargʻona – Abu-Dabi, Qarshi – Abu-Dabi, Termiz – Abu-Dabi, Nukus – Abu-Dabi yoʻnalishida haftasiga jami 41 ta chastotada;

Toshkent – Dubay, Samarqand – Dubay, Namangan – Dubay, Buxoro – Dubay, Navoiy – Dubay, Fargʻona – Dubay, Nukus – Dubay yoʻnalishida haftasiga jami 35 ta chastotada;

Toshkent – Sharja, Namangan – Sharja, Samarqand – Sharja, Fargʻona – Sharja, Qarshi – Sharja, Termiz – Sharja yoʻnalishida haftasiga jami 23 ta chastotada;

Toshkent – Ras al-Hayma, Samarqand – Ras al-Hayma yoʻnalishlarida haftasiga jami 6 ta chastotada;

Toshkent – Fujayra yoʻnalishida esa haftasiga 3 ta chastotada parvozlarni amalga oshirishlari mumkin boʻladi.

Mazkur kelishuv har ikki mamlakat oʻrtasida xorijiy sayyohlar hamda tranzit yoʻlovchilarning oʻzaro almashinuvi, ziyorat turizmi rivojlanishi, shuningdek, Oʻzbekistonda yangi tashkil etilayotgan aviakompaniyalar uchun parvozlar geografiyasini kengaytirish hamda xizmatlar eksporti hajmining oshishiga xizmat qiladi, deb xabar beradi Transport vazirligi matbuot xizmati.