Bugun Oʻzbekiston bilan Misr oʻrtasidagi munosabatlar mamlakatlarimiz rahbarlari oʻrtasidagi doʻstona va iliq munosabatlar tufayli sifat jihatidan yangi bosqichga koʻtarilyapti. Bu qishloq xoʻjaligi sohasidagi ikki tomonlama aloqalar sifatiga ham ijobiy taʼsir koʻrsatadi.
Misr ham Oʻzbekiston singari oʻzining paxtasi, ayniqsa, jahon bozorida juda mashhur va xaridorgir boʻlgan ingichka tolali navlari bilan mashhur.
Joriy yilda Oʻzbekistonda 18 ming gektar maydonga ana shunday ingichka tolali paxta ekish moʻljallangan. Rivojlanayotgan tendensiyalarni inobatga olgan holda, Surxondaryo viloyatida ingichka tolali paxta yetishtirish ilmiy-tadqiqot instituti tashkil etildi. Oq oltinning bu navlarini yetishtirish uchun eng maqbul hududlar Surxondaryo, Qashqadaryo, Buxoro va Navoiy viloyatlaridir.
Oʻtgan yil 30-noyabrda Misr paxtachilik, urugʻchilik va yetishtirish agrotexnologiyalari ilmiy-tadqiqot instituti bilan ingichka tolali paxtachilik mahalliy ilmiy-tadqiqot instituti oʻrtasida hamkorlik memorandumi imzolangan edi. Bugungi kunda mazkur ilmiy markazlar oʻrtasida genofond almashinuvi, organik paxta tolasini yetishtirish va suvni tejovchi texnologiyalarni joriy etish boʻyicha amaliy tadqiqotlar olib borish, oʻzbek navlarini Misrda sinovdan oʻtkazish, ikki davlatning urugʻchilikka boʻlgan standartlar va talablarini muvofiqlashtirish ustuvor vazifa hisoblanadi. Shuningdek, gʻoʻzaning tezpishar, serhosil, kasallik va zararkunandalarga chidamli navlarini yaratish hamda Oʻzbekiston va Misr patentlarini oʻzaro tan olishni tashkil etish boʻyicha seleksiya ishlari qishloq xoʻjaligi sohasidagi aloqalarni mustahkamlashning muhim qadamlaridan biridir.
Muzokaralar davomida oʻzaro tovar ayirboshlash hajmini oshirish uchun fitosanitariya va oʻsimliklar karantini boʻyicha chora-tadbirlarni amalga oshirish juda muhim ekani taʼkidlandi. Bu qishloq xoʻjaligi mahsulotlarini olib kirish, eksport qilish va reeksport qilish uchun fitosanitariya ruxsatnomalarini koʻrib chiqish va berish jarayonini tezlashtiradi. Shuningdek, ingichka tolali paxtachilikni rivojlantirish, ilmiy yoʻnalishdagi aloqalarni kengaytirish masalalari ham muhokama qilindi. Oʻzbekistonda ham, Misrda ham katta salohiyatga ega oliy taʼlim muassasalari mavjud boʻlib, bu salohiyatdan toʻliq foydalanish zarurligi taʼkidlandi.
Chorvachilik va veterinariya sohasida yaqin hamkorlikni yoʻlga qoʻyish borasida koʻplab istiqbolli yoʻnalishlar mavjud. Oʻzbekistonda Misr texnologiyasidan foydalangan holda veterinariya preparatlari va ozuqa qoʻshimchalarini ishlab chiqarishni tashkil etish taklifi bildirildi.
Eslatib oʻtamiz, Misr intensiv baliq yetishtirish boʻyicha katta tajribaga ega, bu ham alohida eʼtiborga loyiqdir. Mamlakatlarimiz bir-biridan uzoqda joylashganiga qaramay, Oʻzbekiston va Misrning kesishish nuqtalari koʻp. Qishloq xoʻjaligi ham bundan mustasno emas. Bugungi kunda soha rahbariyati oldida oʻzaro tovar ayirboshlash hajmi va nomenklaturasini oshirish, ilmiy almashinuvni kengaytirish, hamkorlikning yangi yoʻnalishlarini rivojlantirish vazifasi turibdi, deb xabar beradi Qishloq xoʻjaligi vazirligi matbuot xizmati.
