Suhbat chogʻida ustuvor yoʻnalishlarda ikki tomonlama hamkorlikning bugungi holati va uni kengaytirish istiqbollari muhokama qilindi. Toshkent shahrida “Markaziy va Janubiy Osiyo: mintaqaviy oʻzaro bogʻliqlik. Muammolar va imkoniyatlar” mavzusida oliy darajadagi Xalqaro konferensiyasi doirasida ikki davlat yetakchilarining boʻlib oʻtgan uchrashuvi strategik sheriklikni rivojlantirishga yangi turtki bergani taʼkidlandi.
Tomonlar Oʻzbekiston-Pokiston hamkorligining sermazmun kun tartibini muhokama qilib, investitsiyaviy, savdo-iqtisodiy, transport va logistika hamkorligini yanada kuchaytirish chora-tadbirlariga alohida eʼtibor qaratdilar.
Oʻzbekiston va Pokiston iqtisodiy sheriklik oʻsib borayotgan koʻrsatkichlarining fonida ikkala mamlakat oʻzaro savdo aylanmasi hajmini oshirish, birgalikda amalga oshirilayotgan investitsiya loyihalari sonini koʻpaytirish hamda sanoat kooperatsiyasini chuqurlashtirish uchun foydalanilmagan salohiyatga ega ekani qayd etildi. Masalan, 2021-yilda pandemiyaning salbiy oqibatlariga qaramay, mamlakatlar oʻzaro savdo hajmini 50 foizga oshirishga muvaffaq boʻldi va soʻnggi bir necha yil ichida Oʻzbekistonda Pokiston kapitali ishtirokida faoliyat koʻrsatadigan korxonalar soni deyarli 6 baravarga oshdi.
Tomonlar farmatsevtika tarmogʻida qoʻshma loyihalarni amalga oshirish va qurilish materiallari ishlab chiqarish boʻyicha erishilgan muvaffaqiyatlarni olqishladilar. Shu bilan birga, tomonlar yengil sanoat, qishloq xoʻjaligi, sogʻliqni saqlash va boshqa sohalarda investitsiyaviy va savdo-iqtisodiy hamkorlikni faollashtirish boʻyicha jadal ish olib borayotgani maʼlum qilindi. Mavjud barcha masalalarni hal etishga, xususan, Imtiyozli savdo toʻgʻrisidagi bitimni kelishish va Tranzit savdosi toʻgʻrisidagi bitimni amalga oshirish boʻyicha Qoʻshma harakatlar rejasini hayotga joriy etish bilan bogʻliq qoʻshma tadbirlarni ilgari surishga oʻzaro tayyorlik bildirildi.
“Termiz - Mozori - Sharif - Kobul - Peshavor” trans-afgʻon temir yoʻlini qurish loyihasi va uni amalga oshirish boʻyicha navbatdagi tadbirlarga alohida eʼtibor qaratildi. Tomonlar ushbu tashabbus mintaqaning iqtisodiy rivojlanishini ragʻbatlantirish hamda transport va tranzit salohiyatini oshirish uchun muhimligini taʼkidlab, ilgari erishilgan kelishuvlarni amalga oshirishga oʻzaro sodiqligini taʼkidladilar.
Hududlararo hamkorlikni kengaytirish masalalari ham muhokama qilindi. Tomonlar joriy yil fevral oyida Pokistonning Panjob provinsiyasi rahbarining Buxoro va Namangan viloyatlariga tashrifini olqishlab, sanoat va taʼlim sohalarida erishilgan kelishuvlarni amalga oshirishga tayyor ekanliklarini bildirdilar. Termiz (Oʻzbekiston) va Peshavor (Pokiston) shaharlari, shuningdek, Oʻzbekiston Respublikasining Surxondaryo viloyati va Pokiston Islom Respublikasining Xayber-Paxtunxva provinsiyasi oʻrtasida ikki tomonlama aloqalarni oʻrnatish istiqbollari qayd etildi, deb xabar beradi Investitsiyalar va tashqi savdo vazirligi matbuot xizmati.
