Mazkur vaksina Xitoy Xalq Respublikasida tezkor foydalanish uchun ruxsat berilgan koronavirusga qarshi ishlab chiqarilgan toʻrtinchi vaksina hisoblanadi.
Mazkur vaksina ustidagi tadqiqotlar 2020-yilning boshida boshlangan boʻlib, ilmiy natijalari xalqaro “Cell” jurnalida chop etildi. 2020-yilning oktyabrida vaksinaning I va II faza sinovlari yakunlandi.
Natijalarda vaksinatsiyaning butun kursi davomida yengil reaksiyadan ortiq jiddiy nojoʻya taʼsirlar yuzaga kelmagani qayd etildi, shuningdek, vaksinani qabul qilishda samardorlikni baholovchi xususiyatlardan biri boʻlgan qonda neytrallovchi antitanachalarning hosil boʻlishi belgilangan talablarga toʻgʻri kelishi aniqlandi.
2020-yilning noyabr oyidan Xitoy, Oʻzbekiston, Pokiston, Ekvador va Indoneziyada vaksinaning III faza klinik sinovlari boshlandi. Mazkur III faza klinik tadqiqotlari muvaffaqiyatli oʻtdi, tadqiqotlarni birinchilardan boshlagan Oʻzbekistonda ham vaksinaning jiddiy nojoʻya taʼsirlari aniqlanmadi.
Mazkur vaksina boʻyicha tadqiqot ishlarida faol ishtiroki uchun xitoylik hamkorlar tomonidan Oʻzbekiston hammuallif sifatida tan olindi. Mazkur vaksina Oʻzbekistonda ZF-UZ-VAC 2001 nomi bilan roʻyxatdan oʻtdi.
Mazkur vaksina saqlash va transportirovkasi jarayonlari kamharjligi bilan ajralib turadi, deb xabar beradi Sogʻliqni saqlash vazirligi matbuot xizmati.
