Mamlakatimizning ushbu nufuzli xalqaro tashkilot bilan hamkorligini yanada kengaytirish, Barqaror rivojlanish maqsadlariga erishish, inson huquqlarini himoya qilish va gender tenglikni taʼminlash, yoshlarni qoʻllab-quvvatlash boʻyicha ustuvor yoʻnalishlarda amaliy va konstruktiv muloqotni davom ettirish kabi masalalar muhokama etildi.
Shuningdek, PI bilan birgalikda oʻtkaziladigan tadbirlar, xususan 2025-yil yurtimizda boʻlib oʻtadigan 150-yubiley Assambleyaga tayyorgarlik koʻrish va uning doirasidagi tadbirlarni oʻtkazishning tashkiliy jihatlari koʻrib chiqildi.
Martin Chungong taʼkidlaganidek, boʻlajak Assambleyaning asosiy mavzusi Oʻzbekiston tomonining ustuvor yoʻnalishlari va takliflaridan kelib chiqib belgilanadi.
— Toshkent sammiti nafaqat PI, balki butun jahon parlament harakati uchun tarixiy ahamiyatga ega boʻladi. Uning doirasida qabul qilingan qarorlar tashkilotimizning oʻrta va uzoq muddatli istiqboldagi rivojlanish yoʻnalishlarini belgilaydi — dedi, Martin Chungong.
Muloqot chogʻida joriy yil may oyida Samarqandda oʻtkaziladigan Osiyo xotin-qizlar forumi dasturidan maxsus parlament segmenti oʻrin olgani taʼkidlanib, uni muvaffaqiyatli oʻtkazilishida PIning koʻmagiga umid bildirildi, deb xabar beradi Oliy Majlis Senati matbuot xizmati.