Ilk marotaba 2021-yilning 5-14 aprel` kunlari mamlakatimizda 4-sinf o'quvchilarining matnni o'qib tushunish darajasini baholash bo'yicha xalqaro tadqiqotlar o'tkazildi. Tadqiqotda respublikamizdagi 180 ta maktabda tahsil oluvchi 5 948 nafar 4-sinf o'quvchilari hamda ularning ota-onalari, maktab direktorlari va sinf rahbarlari ishtirok etdi.
Shuningdek, 2022-yilning aprel oyida yurtimizdagi 202 ta maktabda PISA xalqaro baholash tadqiqotlari o'tkazildi. Tadqiqotda yurtimizning 15 yoshli maktab o'quvchilari tabiiy-ilmiy savodxonlik, matematik savodxonlik hamda o'qish savodxonlik yo'nalishlari bo'yicha ishtirok etdi.
Navbatdagi xalqaro baholash tadqiqotlari 2023-yilda o'tkaziladi. Kelgusi yilda o'tkazilishi rejalashtirilayotgan TIMSS-2023 tadqiqotlarida 4- va 8-sinf maktab o'quvchilari tabiiy fanlar hamda matematika fanidan o'z bilimlarini sinab ko'radi.
Dunyodagi rivojlangan mamlakatlar ta'lim tizimida ta'lim sifatini oshirish, xalqaro baholash jarayonlarida munosib qatnashish masalasiga alohida e'tibor qaratilmoqda. Xalqaro tadqiqotlarga tayyorgarlik ko'rishga yo'naltirilgan PISA, TIMSS, PIRLS xalqaro baholash dasturlari doirasidagi topshiriqlar bilan ishlash ko'nikmasini shakllantirish, o'qituvchi va o'quvchilarni tayyorlash, ularning bilim, ko'nikma va kompetentsiyalarini, shuningdek, o'quvchilarda ijodiy va mantiqiy fikrlash hamda tegishli fan yo'nalishlari bo'yicha savodxonligini rivojlantirish, o'qituvchilarga amaliy va uslubiy yordam berish maqsadida Xalq ta'limi vazirligi va A.Avloniy nomidagi milliy-tadqiqot instituti tomonidan Stesting elektron platformasi (https://stesting.uz) ishlab chiqildi.
Ushbu platformada 1449 ta test-topshiriqlari, 103 ta mediakurslar, 40 ta kimyo va biologiya fanlaridan malaka oshirish media kurslari o'rin olgan. Shulardan, PISA xalqaro baholash tadqiqotiga oid 30 ta blok va 489 ta savollar bo'lsa, TIMSS xalqaro baholash tadqiqotiga oid esa 8 ta fanga tegishli 583 ta nazorat savollar joy olgan va PIRLS xalqaro baholash tadqiqotiga oid 30 ta blokdan iborat 377 ta savollar platformaga joylashtirilgan.
Stesting elektron platformasi statistikasiga e'tibor qaratadigan bo'lsak, 2022 yilning fevral`-iyul` oylari davomida yurtimizdagi 7750 dan ortiq maktab ushbu elektron plaftformadan ro'yhatdan o'tgan bo'lib, ularda 2 500 000 dan ortiq maktab o'quvchilarimiz test-topshiriqlarni bajarib kelmoqda. Ushbu bajarilgan test-topshiriqlar 12 nafar malakali pedagog-mutaxassislar tomonidan o'zbek va rus tillarida tekshirilib, baholanmoqda. Hozirda 2 000 000 dan ortiq test-topshiriq tekshirilib, baholandi.
Hozirda milliy tadqiqot instiuti mazkur loyihaning yangi kontent va test topshiriqlari bilan boyitish maqsadida, "Stesting"2 loyihasi ustida ishlar olib borilmoqda.
Ma'lumot o'rnida qayd etish lozimki, instiutning STESTING.UZ trenajyor platformasi o'qituvchi va o'quvchilar uchun tashkil etilgan. Marhamat, bepul platformada xalqaro baholash dasturlariga tayyorlanishingiz mumkin!
