Toshkent viloyati hokimligi poytaxt va “Toshkent dengizi” oraligʻida tezyurar avtobus (BRT) loyihasini amaliyotga tatbiq etish maqsadida uning texnik-iqtisodiy asosini ishlab chiqish uchun arxitektorlar, muhandislar, rejalashtiruvchi mutaxassislarni jalb etyapti.
Gap shundaki, joriy yil 11-oktyabrda Xalq deputatlari Toshkent viloyati Kengashi raisi Davron Hidoyatov viloyat Kengashining “Xalqaro tajribani keng qoʻllash bilan Toshkent viloyatida jamoat transportini yanada rivojlantirish chora-tadbirlari toʻgʻrisida”gi qaroriga imzo chekdi.
Qarorda qayd etilishicha, loyihaning konsepsiyasi ishlab chiqilgan. Uning texnik-iqtisodiy asosini ishlab chiqish uchun viloyat byudjetining orttirib bajarilgan qismidan 6,9 milliard soʻm ajratish rejalashtirilgan, deb xabar beradi Toshkent viloyat hokimligi matbuot xizmati.