Maʼlum boʻlishicha, Toshkent viloyatidagi MCHJning muqaddam sudlangan xodimi Navoiy viloyatidagi xususiy korxona ish boshqaruvchisining ishonchiga kirib, 2025–2026 yillarda goʻyoki 20 mlrd soʻmlik tovar aylanmasi mavjudligi haqida qalbaki hujjatlar tayyorlashni taklif qilgan.

U soliq organlaridagi tanishlari orqali 2 mlrd soʻm QQSni qaytarib berishini aytib, bu «xizmat» uchun 340 mln soʻm talab qilgan.

Sxemada uning sherigi — Andijon shahrida yashovchi yakka tartibdagi tadbirkor ham ishtirok etgan. U oʻzaro tanish korxonalar oʻrtasida soxta elektron shartnomalar rasmiylashtirib, umumiy qiymati 18 mlrd 670 mln soʻm boʻlgan qurilish-montaj ishlari, transport xizmati va qurilish materiallari etkazib berilgani haqida 10 ta soxta hisob-faktura shakllantirgan. Shu orqali byudjetdan 2 mlrd soʻm QQS qaytarilishiga erishilgan.

Shundan soʻng, talab qilingan 340 mln soʻmni jinoyiy sheriklar orqali olish vaqtida ular qoʻlga olindi. Ushbu mablagʻ oʻzaro taqsimlanishi rejalashtirilgani maʼlum boʻldi.

Holat yuzasidan toʻrt nafar shaxsga nisbatan Jinoyat kodeksining tegishli moddalari bilan jinoyat ishi qoʻzgʻatildi. Ayni paytda ushbu sxemada ishtirok etgan boʻlishi mumkin boʻlgan soliq organlari hodimlarini aniqlash boʻyicha tergov harakatlari davom etmoqda.