Kitob tumanida boʻlib oʻtgan seminarda malinachilikni rivojlantirib, ichki bozorni shu turdagi mahsulot bilan toʻkin qilish uchun katta imkoniyat mavjudligi, bu borada aholiga arzon narxda koʻchat yetkazib berilishi, artezian qudugʻi qurish uchun subsidiya, issiqxona barpo etish uchun imtiyozli narxlarda kredit mablagʻlari ajratilishi taʼkidlandi.
Amaliy seminarda “Varganza Bogʻishamol” tomorqa xizmati masʼuliyati cheklangan jamiyatining 1 gektarlik oʻquv-tajriba maydonida vodiydan kelgan fermerlar tomonidan aholiga malina koʻchatlarini ekish texnologiyasi boʻyicha mahorat darslari tashkil etildi.
Shuningdek, vodiylik ishbilarmonlar tomchilatib va yomgʻirlatib sugʻorish uskunalaridan foydalanish boʻyicha ham tajriba almashishdi.
Joriy yilda Kitob tumani aholi tomorqalarida tajriba sifatida 10 gektar malina koʻchati yetishtirish moʻljallanmoqda.
