Bu boʻyicha Qashqadaryo viloyati hokimining qarori qabul qilindi.
Viloyat hokimligi matbuot xizmatining maʼlum qilishicha, Qashqadaryo viloyati hokimi Murotjon Azimov tashabbusi bilan 134 nafar talaba xotin-qizning oliy taʼlim muassasalarida oʻqishi uchun toʻlov-kontrakt xarajatlariga qariyb 1 mlrd 128 mln soʻm mablagʻ ajratilgan.
Qarorga muvofiq, viloyat boʻyicha 18 nafar 1-kurs va 116 nafar yuqori kurs talabalarining toʻlov-kontrakt pullari toʻliq qoplab berilmoqda.
“Ushbu ragʻbat xotin-qizlar uchun katta imkoniyatlar yaratadi. Ayrim talabalar moliyaviy qiyinchiliklar sababli oliy taʼlim olish imkoniyatidan mahrum boʻlishi mumkin edi. Bu tashabbus esa ularning kelajakda yuqori malakali mutaxassis boʻlishlariga zamin yaratadi”, — deyiladi hokimlik xabarida.
