Jo'qorg'i Kenesh deputati Tazabek Ikromov Jinoyat va Oila kodekslariga, shuningdek, “Davlat fuqarolik xizmati va munitsipal xizmat to'g'risida”gi qonunga o'zgartish va qo'shimchalarni taqdim etdi, unga ko'ra, mehnatga layoqatli farzandlarning keksa ota-onalar uchun javobgarligini kuchaytirish taklif etilmoqda.
Deputatning aytishicha, bugungi kunda keksa ota-onalarni qariyalar uyiga topshirish odatiy holga aylangan.
“Ijtimoiy muassasalarda keksalar soni ortib bormoqda. Ular turli sabablarga ko'ra u yerga topshirilmoqda, asosan farzandlar ularni tashlab ketishyapti. Ota-onasini tashlab ketgan fuqarolarni javobgarlikka tortish uchun sud qarori kerak. Lekin amalda birorta ota-ona farzandiga qarshi ariza yozmaydi. Ushbu qonun loyihasi qabul qilinsa, birorta shaxs qariyalar uyiga topshirilganida, muassasa rahbariyati huquqni muhofaza qiluvchi organlarga ariza yuboradi va ish sudda ko'rib chiqiladi”, — dedi Tazabek Ikromov.
Deputat ota-onasini qariyalar uyida qoldirgan fuqaro javobgarlikka tortilsa, jarima miqdorini 50 mingdan 100 ming somga oshirishni taklif qilmoqda. Bu norma Qirg'iziston Respublikasi Jinoyat kodeksining 179-moddasi “Bolalarning ota-onasini boqishdan bo'yin tovlash”da nazarda tutilmoqda.
Shuningdek, deputat ota-onasini qarovsiz qoldirgan farzandlar davlat xizmatiga qabul qilinmaydigan qoida kiritishni taklif qildi.
Qo'mita a'zolari qonun loyihasini birinchi o'qishda ma'qulladi, deb xabar beradi tengrinews.kz.