баннер
3 Apr 2025
13:43

    Qozogʻistonda ota-ona qaramogʻisiz qolgan 10 nafar oʻzbekistonlik bola vatanga qaytarildi

    Bolalar Oʻzbekiston Respublikasi Ichki ishlar va Sogʻliqni saqlash vazirligi hamkorligida vatanga olib kelindi.

    Qayd etilishicha, Oʻzbekistonning Qozogʻistondagi konsullik xodimlari ushbu bolalarning tez va xavfsiz vatanga qaytishini taʼminlash maqsadida barcha zarur hujjatlarni rasmiylashtirdi.

    Ayni paytda bolalar vaqtincha Toshkent shahar IIBB qoshidagi voyaga yetmaganlarga ijtimoiy-huquqiy yordam koʻrsatish markaziga joylashtirilgan. Bolalardan 8 nafari yaqin kunlarda Qoraqalpogʻiston Respublikasiga yoʻl olishadi va u yerda “Inson“ ijtimoiy xizmatlar markazlari tomonidan tayyorlangan oila aʼzolari va yaqin qarindoshlariga topshiriladi.

    Statistik maʼlumotlarga koʻra, oʻtgan uch oyda xorijdan vatanga qaytarilgan bolalar soni 31 nafarni tashkil qildi. Bu oʻtgan yilning shu davriga nisbatan 2,5 barobar koʻp.

    Maʼlumot uchun, yaqin kunlarda Sankt-Peterburgdan 10 nafardan ortiq bolalardan iborat guruh ham Oʻzbekistonga qaytarilishi rejalashtirilgan.

    Telegram kanalimiz
    Text to speech