Ijtimoiy himoya milliy agentligining xabar berishicha, shu yilning 7-aprel kuni voyaga yetmagan bola oila aʼzolariga moddiy koʻmak koʻrsatish maqsadida oʻqishni tashlab, amakisi hamrohligida Qozogʻiston Respublikasiga joʻnab ketgan.
Biroq, 2025-yil 2-may kuni Qozogʻiston Respublikasida ushbu voyaga yetmagan Oʻzbekiston fuqarosi ota-ona qaramogʻisiz qolgan holatda aniqlanib, maxsus ijtimoiy xizmatlar muassasasiga joylashtirilgan. Garchi bola Qozogʻistonga ishonchnoma asosida olib oʻtilgan boʻlsada, mamlakat amaldagi qonunchiligiga muvofiq, bunday muassasalardan voyaga yetmagan shaxsni faqat uning ota-onasi olib chiqish huquqiga ega.
Oʻzbekiston Respublikasi Prezidenti huzuridagi Ijtimoiy himoya milliy agentligi va Ichki ishlar vazirligi tomonidan koʻrilgan tezkor choralar natijasida bola 2025-yil 20-may kuni Oʻzbekistonga olib kelindi.
Maʼlumot uchun: joriy yil boshidan buyon Qozogʻistondan jami 12 nafar ota-ona qaramogʻisiz qolgan voyaga yetmagan Oʻzbekiston fuqarosi vatanga qaytarildi. Hozirda yana 5 nafar bola davlat yordami asosida qaytarilishini kutmoqda.
