Unda sanʼatkorlarga diniy siyosat konsepsiyasi kabi hujjatlar boʻyicha tushuntirish berildi. Shuningdek, yigʻilishda konsert-tomosha faoliyati uchun litsenziya talab va shartlari hamda mualliflik huquqi kabi masalalar haqida ham soʻz yuritildi.
Xabarga koʻra, yigʻilishda oʻzbek sanʼatkorlarining maʼnaviy-madaniy faoliyati, “Sanʼatkor odob-axloqi”, “Oʻzbekiston Respublikasida fuqarolarning vijdon erkinligini taʼminlash va diniy sohadagi davlat siyosati konsepsiyasi” mazmuni, shuningdek sanʼatkorlarning konsert-tomosha faoliyati uchun litsenziya talab va shartlari hamda mualliflik huquqi kabi masalalar muhokama qilingan. Majlisda shuningdek, “Tadbirkorlar huquqlari va qonuniy manfaatlarini ishonchli himoya qilish chora-tadbirlari toʻgʻrisida”gi prezident farmoni va bir qancha nizomlar yuzasidan tushuntirish berilgan.
“Yigʻilish davomida «Litsenziyalash, ruxsat berish va xabardor qilish tartib-taomillari toʻgʻrisida”gi Oʻzbekiston Respublikasi Qonuniga asosan “Oʻzbekkonsert” davlat muassasasi tomonidan konsert-tomosha faoliyatini amalga oshirishda sanʼatkorlarning majburiy talablarga rioya qilishi hamda asosiy litsenziya talablarida ijrochilarning “konsert-tomosha sohasida u yoki bu dinni targʻib qilmaslik” masalalari ham muhokama qilindi.
Bundan tashqari, Madaniyat vazirining birinchi oʻrinbosari Bahodir Ahmedov milliy urf-odatlar, qadriyatlar va anʼanalarga hurmat bilan munosabatda boʻlish, dabdababozlik, shohona hayotni koʻz-koʻz qilmaslik va boshqa salbiy illatlarga yoʻl qoʻymaslik, jamoat joylarida, atrofdagilar eʼtiborini tortuvchi ortiqcha salbiy harakatlar qilmaslik kerakligini taʼkidlagan.
Shu bilan birga, yigʻilishda kuy-qoʻshiqlarning mazmuniga eʼtibor qaratish, mualliflik huquqlarining buzilish holatlariga ham toʻxtalib oʻtilgan. Xonandalarga oʻz ijodlari davomida vatanga muhabbat, sadoqat, vatanparvarlik ruhidagi qoʻshiqlarni koʻpaytirish, oʻsib kelayotgan yosh avlodga namuna boʻlishlari zarurligi urgʻulandi.
