Jizzax viloyatida faoliyat koʻrsatuvchi bir guruh tadbirkorlik subyektlari ularga nisbatan noqonuniy ravishda qarzdorlik hisoblanganligi va ular asossiz gaz tarmogʻidan uzilganligidan norozi boʻlib, Biznes-ombudsmanga murojaat qildi.
Aniqlanishicha, “Hududgaz Jizzax” xodimlari tomonidan tabiiy gaz sarfini hisobga oluvchi “Fossa” dasturiga yuqoridagi tadbirkorlik subyektlarining hisobiga qariyb 903 million soʻmlik noreal qarzdorlik kiritilgan.
Ushbu holat yuzasidan Biznes-ombudsman tomonidan “Hududgaz Jizzax” gaz taʼminoti filiali mansabdor shaxslari va boshqalarning harakatlariga qonuniy baho berish va ularga nisbatan jinoiy ish qoʻzgʻatish taklifi viloyat prokuraturasiga yuborildi.
Biznes-ombudsmanning taklifi boʻyicha tergovga qadar tekshiruv harakatlari amalga oshirilib, natijada “Hududgaz Jizzax” gaz taʼminoti filiali, “Hududgaz Metrologiya” filiali Jizzax boʻlimi mansabdor shaxslari va boshqalarga nisbatan Oʻzbekiston Respublikasi Jinoyat kodeksining 205-moddasi 2-qismi va 209-moddasi 1-qismi bilan jinoyat ishi qoʻzgʻatildi.
Hozirda jinoyat ishi boʻyicha dastlabki tergov harakatlari olib borilyapti.
