Oylik doirasida Fargʻona viloyat sanʼat ustalari, teatr ijodiy jamoalari maktab va maktabgacha taʼlim muassasalarida taʼlim-tarbiya olayotgan yoshlar bilan madaniy — maʼrifiy tadbirlar, ijodiy uchrashuvlar oʻtkazib, sara sahna asarlarini namoyish etmoqda.
–Maktabimiz oʻquvchi – yoshlari va viloyat Rus drama teatri ijodiy jamoasi bilan boʻlib oʻtgan jonli muloqot, sahna tomoshalari esda qolarli voqea va hodisalarga boy boʻldi,–deydi Fargʻona shahridagi 15 –umumtaʼlim maktabi direktori Muhayyo Yusupova. –Bunday muloqotlar avvalo barkamol avlod taʼlim-tarbiyasi, tafakkur xazinasini boyitadi. Amaliy muloqotlar yoshlarning teatr va sahna sanʼati va ijodiy ish jarayoni bilan bogʻliq tasavvurlarini boyitdi, dunyoqarashlarini kengaytirishga xizmat qilayotgani bilan ahamiyatli.
– Viloyat qoʻgʻirchoq teatrining “Ochil dasturxon” sahna asarini miriqib tomosha qildik, – deydi Fargʻona shahridagi 7-umumtaʼlim maktabining 6 -sinf oʻquvchisi Shohzamon Abdurahmonov. – Hammamizga tanish boʻlgan ertak qahramonlari bilan muloqot qilish, bir sahna, maqsad atrofida jam boʻlish boshqacha boʻlarkan. Oʻzimizni ertaklar olamida yurgandek his qildik. Taassurotlarimiz bir olam. Sinf rahbarimiz bilan qoʻgʻirchoq teatriga tez-tez kelib, yangi sahna asarlarni tomosha qilishni maqsad qilib oldik.
Qiziqarli savol-javoblar, amaliy muloqotlarga boy boʻlgan teatr oyligi doirasida viloyat musiqali drama teatri jamoasi tomonidan “Sehrli libos”, “Ufq”, “Oltin joʻja”, Margʻilon shahar musiqali maqom teatri “Sehrli chimildiq yoxud yoshlikni qoʻmsab”, “Navoiy”, “Halima”, qoʻgʻirchoq teatrining “Musiqali choyxona”, “Karvonsaroy”, “Ochil dasturxon” kabi sahna asarlari tomoshabinlarda katta taassurot qoldirdi.
Rasuljon Kamolov,
“Yangi Oʻzbekiston” muxbiri.
