Bu haqda AOKAda oʻtkazilgan brifingda Bilim va malakalarni baholash agentligi direktori maslahatchisi Zohid Shakarov maʼlum qildi.
Yangi tartibga koʻra professional taʼlim muassasalariga tanlov oliy taʼlim muassasalarining tanlov natijalari eʼlon qilingandan soʻng oʻtkaziladi. Shunga koʻra oliy va professional taʼlim muassasalariga kirish test sinovlarida ishtirok etgan abituriyentlar 2024-yil 18-avgustdan 27-avgustga qadar 10 kun davomida my.uzbmb.uz saytida professional taʼlim muassasasi (kollej yoki texnikum), kasb va mutaxassislik hamda taʼlim shaklini tanlashlari lozim.
Abituriyentlar tanlash muddati yakunlangunga qadar oʻz tanlovlarini oʻzgartirishlari mumkin.
Abituriyentlarning talabalikka tavsiya etilgan yoki etilmagani toʻgʻrisidagi yakuniy tanlov natijalari tanlash toʻliq yakunlangandan soʻng bir hafta muddatda eʼlon qilinadi.
Apellatsiya arizasini bergan abituriyentga uni koʻrib chiqish sanasi va vaqti koʻrsatilgan xabarnoma beriladi.
Abituriyent xabarnomada belgilangan vaqtda shaxsini tasdiqlovchi hujjat va xabarnoma bilan Bilimni baholash agentligiga kelishi kerak.
