2021-yil 18-oktyabrda Toshkent shahar hokimining “Toshkent shahrining 12 ta qadimiy darvozasini tiklash va ularning joylashgan koordinatalarini tasdiqlash toʻgʻrisida”gi 356-14-0-Q/21-sonli qarori qabul qilinib, bu masalada Ishchi guruh shakllantirilgan.
Yigʻilishda Ishchi guruhi tomonidan bugungacha bajarilgan ishlar koʻrib chiqildi. Joriy yilda Poytaxtimizning 12 ta qadimiy darvozalaridan 2 tasini qayta tiklash ishlari olib borilayotgani maʼlum qilindi, deb xabar beradi Toshkent shahar hokimligi matbuot xizmati.
Maʼlumot oʻrnida: 19 asrga qadar Toshkent shahri 12 ta darvozaga ega kuchli qalʼa devori bilan oʻralgan. Har bir darvoza oʻsha hududning qadimiy nomi, markaziy koʻchaning nomlanishi yoki qaysi yoʻnalishda joylashganligiga qarab atalgan: Labzak, Taxtapul, Qorasaroy, Sagʻbon, Chigʻatoy, Koʻkcha, Samarqand, Kamolon, Beshyogʻoch, Koʻymas, Qoʻqon, Qashqar va b. Har bir darvozani maxsus xonada yashagan qoʻriqchi (darvozabon) nazorat qilgan.
