Yigʻilish Oʻzbekiston Respublikasi investitsiyalar, sanoat va savdo vaziri Laziz Kudratov va Rossiya Federatsiyasi iqtisodiy rivojlanish vaziri Maksim Reshetnikov hamraisligida onlayn rejimida oʻtkazildi.

Rossiya Oʻzbekistonning anʼanaviy yirik savdo hamkori hisoblanadi. Joriy yilning 7 oyida tovar ayirboshlash hajmi 29,1 foizga oʻsib, 6,8 milliard dollarni tashkil etdi, bu davrda Rossiya Federatsiyasiga 175 tovar pozitsiyalarida eksport hajmining oʻsishi kuzatildi. 11,3 million dollarlik 64 ta yangi tovar eksporti yoʻlga qoʻyildi.

Muzokaralar davomida sanoat, energetika, transport va qishloq xoʻjaligi sohalaridagi tegishli rahbarlarning hisobotlari tinglandi. Ular Oʻzbekiston Respublikasi bilan Rossiya Federatsiyasi oʻrtasidagi 2024-2030-yillarga moʻljallangan oʻzaro tovar ayirboshlash hajmini oshirish boʻyicha qoʻshma Chora-tadbirlar rejasi doirasida kelishilgan loyiha va kelishuvlarni amalga oshirishning bugungi holati toʻgʻrisida maʼlumot berdilar. Taʼkidlash joizki, dastur ikki davlat rahbarlari tomonidan belgilab berilgan tovar ayirboshlash hajmini 30 milliard dollarga yetkazish boʻyicha aniq maqsadga erishishga qaratilgan.

Uchrashuv ishtirokchilari Toshkentda Butunrossiya tashqi savdo akademiyasining filialini ochish va Strategik tashabbuslar ekspert markazi faoliyati bilan ham tanishdilar, deb xabar beradi Investitsiyalar, sanoat va savdo vazirligi matbuot xizmati.

Muzokaralar yakunida hamkorlikni kuchaytirish va ikki davlat oʻrtasidagi savdoni rivojlantirishning barcha yoʻnalishlari boʻyicha birgalikda samarali choralarni koʻrishda davom etishga tayyorlik bildirildi.