Maʼlum qilinishicha, mazkur hududda rejalashtirilayotgan Yoshlar shaharchasi bogʻ oʻrnini egallamaydi va uning maydonini qisqartirmaydi. Mavjud binolar saqlab qolinib, rekonstruktsiya qilinadi hamda taʼlim, ijodiy va ijtimoiy maqsadlarga moslashtiriladi.

Ularda oʻquv va ijodiy markazlar, kutubxona, kovorking maydonlari, simulyatsiya ustaxonalari va startap-studiyalar joylashtiriladi.

Loyiha doirasida alohida biznes-ofislar yoki boshqa tijorat obyektlarini qurish koʻzda tutilmagan. Binolar atrofi obodonlashtirilib, koʻkalamzorlashtiriladi.

Shu tarika, hududning asosiy qismi yashil bogʻ sifatida saqlanadi, mavjud binolar esa yoshlar va shahar aholisi uchun ochiq taʼlim, ijodiy hamda ijtimoiy maydonlarga aylantiriladi.

Loyihaning kelajakdagi koʻrinishi aks etgan renderlar va taqdimot materiallari ham jamoatchilikka taqdim etildi. Tashkilot vakillari shaharliklarni qiziqtirgan savollarga ochiq javob berish va loyihani muhokama qilishga tayyor ekanini bildirgan.