Maʼlum qilinishicha, Oʻzgidromet prognozlariga koʻra, bugun poytaxt hududiga nam havo massalarining kirib kelishi oldidan ayrim joylarda qisqa muddatli chang-toʻzonlar kuzatilishi mumkin.

Kun davomida ob-havo oʻzgaruvchan boʻlishi, baʼzi hududlarda qisqa muddatli yomgʻir yogʻishi kutilmoqda. Shuningdek, shamol tezligi soniyasiga 12–14 metrgacha kuchayishi mumkin. Kuchli shamol taʼsirida ayrim hududlarda chang koʻtarilishi ehtimoli mavjud.

Mutaxassislar qayd etishicha, mazkur holat natijasida atmosfera havosidagi chang zarrachalari, xususan PM10 kontsentratsiyasi qisqa muddatga oshishi mumkin. Biroq bu vaqtinchalik jarayon boʻlib, kunning ikkinchi yarmida kuzatilishi mumkin boʻlgan yogʻingarchilik hisobidan havo sifatining asta-sekin yaxshilanishi kutilmoqda.

Shu munosabat bilan nafas yoʻllari kasalliklari, allergiya hamda yurak-qon tomir tizimi bilan bogʻliq muammolari bor fuqarolarga ehtiyot choralarini koʻrish tavsiya etilmoqda. Zarur holatlardan tashqari uzoql vaqt ochiq havoda boʻlmaslik, xonadonlarda deraza va eshiklarni yopiq saqlash hamda imkoni boricha niqoblardan foydalanish maqsadga muvofiq.

Hozirda atmosfera havosi holati Maxsus komissiya tomonidan doimiy monitoring qilinib, vaziyat nazorat ostida saqlanmoqda.