Davlat xavfsizlik xizmati Chegara qo‘shinlari va Toshkent viloyati bo‘yicha boshqarmasi xodimlari tomonidan boshqa huquqni muhofaza qiluvchi organlar bilan hamkorlikda o‘tkazilgan tadbarda «Toshkent – Farg‘ona» yo‘nalishida harakatlanayotgan «Tracker» rusumli avtomashina to‘xtatildi.

Tekshiruv davomida Farg‘ona shahrida yashovchi, muqaddam talonchilik jinoyati uchun sudlangan shaxs boshqaruvidagi transport vositasi ko‘zdan kechirildi. Avtomobil salonida haydovchi o‘z iste’moli uchun saqlab kelgan narkotik modda aniqlandi.

Qo‘shimcha tekshiruvlar chog‘ida esa avtomashina yukxonasidan jami 8 kilogramm 913 gramm «gashish» musodara qilindi.

Dastlabki ma’lumotlarga ko‘ra, ushbu giyohvandlik moddasi qo‘shni davlatdan kontrabanda yo‘li bilan olib kirilgan bo‘lib, gumonlanuvchi uni qabul qilib olganidan so‘ng doimiy yashash manziliga olib ketayotgan bo‘lgan.

Mazkur holat yuzasidan jinoyat ishi qo‘zg‘atilgan bo‘lib, tergov harakatlari davom ettirilmoqda.

DXX fuqarolarni giyohvandlik vositalari savdosi bilan bog‘liq holatlarga duch kelganda 1520 qisqa raqami orqali xabar berishga chaqirdi.