Tadbirda Turizm qo‘mitasi raisining birinchi o‘rinbosari Jamshid Abdusalamov, Toshkent davlat iqtisodiyot universiteti rektori To‘lqin Teshaboev, turizm sohasining tajribali mutaxassislari, TDIU professor-o‘qituvchilari va talabalari hamda ommaviy axborot vositalari vakillari ishtirok etdilar.

Ochilish marosimida tantanali ravishda qizil lenta kesilib, universitet rahbariyati, kafedra mutaxassislari va mehmonlar ta’lim sohasidagi yangiliklar va kafedraning kelajakdagi rejalari haqida so‘z yuritdilar. Shuningdek, filial turizm va mehmonxona sohasidagi yuqori malakali kadrlarni tayyorlash, turizmni mamlakat iqtisodiyotidagi muhim tarmoqqa aylantirish uchun katta hissa qo‘shishini ta'kidladilar.

Mehmonlar professor-o‘qituvchilar va tadqiqotchilar uchun Turizm qo‘mitasida tashkil etilgan ilmiy-tadqiqot va o‘quv xonalari hamda axborot-resurs markazi (kutubxona)ning faoliyati bilan tanishdilar, deb xabar beradi Turizm qo‘mitasi matbuot xizmati.