Xalq ta’limi vazirligi tomonidan Toshkent shahar Olmazor tumanidagi 22-maktabda o‘tkazilgan umumta’lim maktablarida raqamli kutubxona tizimini joriy etishga bag‘ishlangan press-turda bu borada olib borilayotgan ishlarga alohida to‘xtalib o‘tildi.
Ta’kidlanganidek, mamlakatimizdagi mavjud umumta’lim maktablari kutubxonalarida jami 15,3 million nusxa adabiyotlar fondi mavjud bo‘lib, shundan 7,7 million nusxasi lotin alifbosidagi adabiyotlar hisoblanadi. 1,6 million nusxa (10,3 foiz) rus, 23 ming nusxa tojik, 92 ming nusxa qozoq, 3,5 ming nusxa qirg‘iz, 609 nusxa turkman tilidagi badiiy adabiyotlar mavjud. Shuningdek, kitoblarning 78,5ning nusxasini chet tillar (ingliz, nemis va fransuz)dagi adabiyotlar tashkil qiladi.
Maktab kutubxonalaridagi doimiy kitobxon o‘quvchilar soni 3,1 million nafardan iborat.
O‘quvchilarni internet tarmog‘i orqali kitob mutolaasiga qiziqtirish maqsadida www.kitob.uz sayti tashkil etilgan bo‘lib, ushbu portalga badiiy adabiyotlarning 5 mingdan ziyod elektron shakllari joylashtirilgan. Hozirda saytdan bir kunda o‘rtacha 11-12 ming nafar o‘quvchi-yoshlar foydalanmoqda.
O‘quvchilar uchun 120 nomdagi o‘zbek mumtoz va zamonaviy hamda jahon adabiyoti namunalarining audio kitob shakldagi variantlari yaratilib, mazkur audio kitoblar www.kitob.uz saytiga yuklab olish va onlayn tinglash uchun joylashtirildi.
Bolalar kutubxonalari va maktab kutubxonalari uchun xorijiy davlatlar kutubxonalariga sayohatlar uyushtirish imkoniyatini beruvchi virtual maydonlar tashkil etildi.
www.kitob.uz platformasidagi “VR kutubxona” bo‘limiga qo‘shilgan mazkur maydonda xorijiy davlatlarda joylashgan zamonaviy kutubxonalarning VR 360 panorama ko‘rinishidagi video mahsulotlar (25 dona) hamda ushbu kutubxonalar haqida qisqacha ma’lumotlar joylashtirilgan.
Ta’kidlanganidek, bolalarni elektron kutubxona imkoniyatlaridan keng foydalanishlarini ta’minlash maqsadida Toshkent shahridagi 41 ta hamda Shayxontohur tumanidagi 36 ta maktabda raqamli kutubxona loyihasi to‘liq joriy etildi va ishga tushirildi.
Poytaxtimizning Olmazor tumanidagi 22 maktabda o‘tkazilgan press-tur tadbirlari davomida umumta’lim maktablarida raqamli kutubxona tizimini joriy etish va uning o‘quvchilar o‘rtasida kitobxonlik madaniyatini oshirishdagi o‘rniga alohida to‘xtalib o‘tildi.
Qayd etilganidek, raqamli kutubxona tizimi nafaqat o‘quvchilar, balki maktab o‘qituvchilari uchun qator qulayliklar yaratadi. Xususan, kutubxona fondi tarkibidagi o‘n minglab kitoblar orasidan kerakli adabiyotlarni kalit so‘z orqali topish, mavjud kitoblarning monitoringini yuritish imkoniyatini yaratildi.
Shu bilan birga o‘quvchilar o‘rtasida qaysi kitoblarga talab kattaligi xususidagi tahliliy ma’lumotlar doimiy nazorat qilib boriladi.
Ushbu tizimning yana bir qulayligi shundaki, o‘quvchilarning internet tizimidagi mavjud elektron o‘quv platformalari yordamida kitob o‘qish imkoniyati bir necha baravar ortadi. Bu orqali o‘quvchi-yoshlarning bo‘sh vaqtlarini zamonaviy o‘quv tizimi bilan uzviy bog‘liqliligi ta’minlanadi.
Mazkur maktablarda hozirgi kunda raqamli kutubxona platformasiga kiritilgan o‘quvchilar soni 40 689 nafarni tashkil etadi. Tizimga yuklangan kitoblarning umumiy soni 95 686 tadan iborat bo‘lib, undan foydalanib kelayotgan faol kitobxonlarning umumiy soni ayni vaqtda 2 300 nafardan ortiqni tashkil etmoqda.
Press-tur tadbirlari davomida jurnalistlar tomonidan mavzuga doir berilgan savollarga mutasaddilar tomonidan atroflicha ma’lumot berib o‘tildi.
