Quyida velosipedda harakatlanishning asosiy foydalari haqida toʻxtalib oʻtamiz.

1. Yurak-qon tomir tizimi uchun foydasi.

Bu mashgʻulot yurak-qon tomir tizimi faoliyatini yaxshilashga yordam beradi. Xususan, yurak urishi va qon bosimini meʼyorlashtirib, ogʻir yurak xastaliklari xavfini sezilarli darajada kamaytiradi.

2. Mushaklarni mustahkamlaydi.

Velosiped uchish boʻgʻim va mushaklarni mustahkamlaydi. Boisi bu paytda tanadagi barcha mushaklar faol harakatlanib, tonusda boʻladi. Natijada, umumiy jismoniy kuch va chidamlilik ortadi.

3. Ovqat hazm qilishni yaxshilaydi.

Pedalni aylantirish metabolizmni tezlashtirib, ishtahani ochadi. Mazkur holat organizmda moddalar almashinuvi yaxshilanganini bildiradi. Shuningdek, metabolizmning tezlashishi taomning tez hazm boʻlishi va organizmda yogʻ toʻplanmasligiga olib keladi. Bu, oʻz navbatida, ortiqcha vaznni yoʻqotishga zamin yaratadi.

4. Varikozning oldini oladi.

Varikozga moyilligi bor odamlar uchun pedallar juda foydali. Ushbu mashgʻulot paytida qon turgʻunliksiz tomirlar orqali faol aylana boshlaydi. Natijada, varikozning oldi olinadi.

5. Tayanch-harakatlanish tizimi uchun foydasi.

Velosiped uchish suyaklar mustahkamligini oshirib, artrit kabi kasalliklarga chalinish xavfi sezilarli darajada kamayadi.

6. Uyquni yaxshilaydi.

Ushbu jismoniy faollik uyqu sifatiga ijobiy taʼsir koʻrsatadi. Uning yordamida oson uyquga ketish va uyqu davomida yaxshi dam olish mumkin. Shuningdek, doimiy pedal aylantirish organizmda endorfin gormonlarini ishlab chiqarishga koʻmaklashadi. Bu esa kayfiyatni koʻtarib, stress, depressiya va xavotirni kamaytirishga yordam beradi.

7. Immunitetni mustahkamlaydi.

Boʻsh vaqtini muntazam ravishda velosipedda oʻtkazadigan insonlar tananing infeksiyalarga qarshi kurashish qobiliyatini sezilarli darajada oshiradi. Bu bilan velosipedchilar mavsumiy virusli kasalliklardan kamroq azob chekishadi.

8. Qon aylanishini yaxshilaydi.

Velosayohat qilishni kanda qilmaydiganlarda qon aylanishi yaxshilanib, terining holati ijobiy tomonga oʻzgaradi. Sababi, toza havoda jismoniy harakat sabab qon sirkulyatsiyasi, hujayralarning kislorod va boshqa oziq moddalar bilan taʼminlanishi yaxshilanadi. Bunda toksinlar kamayib, kollogen miqdori koʻpayadi va terining erta qarishining oldi olinadi. Natijada, teri tiniq va sogʻlom koʻrinadi.

Bir soʻz bilan aytganda, har kuni velosipedda sayr qilishni odatga aylantirish orqali sogʻlom va faol hayot tarziga erishish mumkin, deya xabar beradi Sogʻliqni saqlash vazirligi.