Uchrashuv davomida Afgʻonistonda uzoq muddatli tinchlikka erishish, uning iqtisodiyotini tiklash, ushbu mamlakatda murakkab ijtimoiy-gumanitar vaziyatni hal etishga koʻmaklashish boʻyicha Oʻzbekiston-Amerika hamkorligini yanada kengaytirish istiqbollari muhokama etildi.
AQSH Maxsus vakillarining taʼkidlashicha, joriy yil iyul oyida Toshkentda boʻlib oʻtgan Afgʻoniston boʻyicha xalqaro konferensiya mazkur davlatdagi vaziyatni yoʻlga solish borasida jahon hamjamiyatining izchil yondashuvlarini ishlab chiqish uchun samarali platforma yaratdi.
Afgʻoniston xalqini qoʻllab-quvvatlash boʻyicha xalqaro saʼy-harakatlarni jadallashtirish va tizimlashtirish zarurligiga alohida eʼtibor qaratildi. Shu nuqtayi nazardan, Termiz shahrida tashkil etilgan Afgʻonistonga gumanitar yordam yetkazib berish uchun Koʻp funksiyali transport-logistika xabining imkoniyatlaridan foydalanish muhimligi eʼtirof etildi, deb xabar beradi Tashqi ishlar vazirligi matbuot xizmati.