Sirdaryo viloyati Xovos tumanida 237 gektar yer maydonida dehqonchilik qilayotgan fermer dalaga suv tejovchi sugʻorish qurilmalarini oʻrnatishga muvaffaq boʻldi.
Fermer Ulugʻbek Yoʻldoshev bankdan olgan 1 milliard 86 million soʻmlik kredit mablagʻlari evaziga 54 gektar paxta maydoniga zamonaviy raqamlashtirilgan sugʻorish qurilmalarini oʻrnatdi. Gap shundaki, ushbu yangi texnologiya qoʻl telefoni orqali boshqariladi.
– Ilgari 54 gektar paxta maydonini 7-8 nafar suvchi kecha-kunduz bir oy mobaynida sugʻorar edi, — deydi fermer Ulugʻbek Yoʻldoshev. —Endi bu ishni bir ishchi kuchi bilan 6-7 kun ichida uddalayapmiz.
Oʻtgan yili 237 gektar yerning 110 gektar dala maydoniga chigit qadagan fermer bu yil 1 milliard 400 million soʻmlik bank kredit mablagʻlari evaziga 56 gektar paxta maydoniga yana qoʻshimcha tomchilatib sugʻorish uskunalarini oʻrnatdi, deb xabar beradi Sirdaryo viloyat hokimligi matbuot xizmati.