Janubiy Koreyaning Yonhap agentligi KXDR yetakchisi Kim Chen Inning “yadroviy materiallar ishlab chiqarish bazasi”ga tashrifini shunday izohladi.
13-sentabr kuni Koreya markaziy axborot agentligi Shimoliy Koreya yetakchisi Kim Chen Inning Yadro qurollari institutiga va “yadroviy qurol uchun yadroviy material ishlab chiqarish bazasiga” tashrif buyurgani haqida xabar berdi. Agentlik muassasa ichidagi fotosuratlarni chop etdi.
Yonhap agentligining qayd etishicha, Shimoliy Koreya shu tarzda o'zining uran boyitish joyi haqidagi tafsilotlarni birinchi marta oshkor qilgan. Koreya Respublikasi ommaviy axborot vositalari bu qadam AQShda bo'lib o'tadigan prezidentlik saylovlari bilan bog'liq bo'lishi mumkinligini taxmin qilmoqda.
“Biz ham, xalqaro hamjamiyat ham Shimoliy Koreyani hech qachon yadroviy davlat sifatida tan olmaymiz, buni Shimoliy Koreya aniq tushunadi”, dedi Koreya Respublikasining birlashish vazirligi shu munosabat bilan. Seul Shimoliy Koreyaning yadroviy dasturi BMT Xavfsizlik Kengashi rezolyutsiyalarini buzishini va bu “tinchlikka jiddiy tahdid solayotganini” aytdi. Koreya Respublikasi hukumati KXDR hukumati “yadroviy qurolga ega bo'lish orqali hech narsaga erisha olmasligini” ta'kidladi va Pxenyanni yadrosizlanish bo'yicha muloqotga chaqirdi, deb xabar beradi tass.ru.
