Respublika patologik anatomiya markazi mamlakatimizdagi patologoanatomik xizmatning bosh muassasasi boʻlib, barcha viloyatlar va yirik shaharlardagi davolash-profilaktika muassasalarida davolanayotgan kasalliklarni biopsiya usulida morfologik jihatdan aniqlash va kasallikdan vafot etganlar murdasini autopsiya usulida tekshirib, bevosita oʻlim sababini aniqlash, klinik diagnozni tahlil qilish, har qanday xatolikni aniqlash kabi tashxislash tadbirlarni amalga oshiradi.

Vrach-patologoanatomlarning asosiy ish quroli yorugʻlik mikroskop va elektron mikroskop hisoblanadi. Yaponiyada ishlab chiqarilgan “JEM-2100Plus” rusumdagi zamonaviy transmission elektron mikroskop Innovatsion rivojlantirish va novatorlik gʻoyalarini qoʻllab-quvvatlash jamgʻarmasidan ajratilgan mablagʻlar hisobidan moliyalashtirildi.

Ushbu transmission elektron mikroskop 1 nanometrli tuzilmani million marta kattalashtirib, 1 millimetr darajada koʻrsatadi. Masalan: 100 nanometrli koronavirusni million marta kattalashtirib, 10 sm qilib koʻrsatadi.

Hozirda “JEM-2100Plus” rusumdagi zamonaviy transmission elektron mikroskopdan toʻliq foydalanish va ilmiy tadqiqot ishlarini bajarish yoʻlga qoʻyildi.

15-apreldan boshlab yurtimizdagi barcha tibbiyot oliy oʻquv yurtlari va ilmiy-amaliy markazlar bilan shartnomalar tuzilib, tadqiqotlar boshlab yuborildi. 1-maydan boshlab tekshirishga qabul qilingan biologik materialga maxsus tartibda ishlov berish, elektron mikroskopda koʻrib oʻrganish, elektronnogrammalar olish, ularni ilmiy jihatdan tavsiflab, egasiga qaytarish yoʻlga qoʻyiladi.

Sogʻliqni saqlash vazirligi
Jamoatchilik bilan aloqalar boʻlimi