Suhbat chog‘ida Gonkong rahbarining O‘zbekistonga tashrifi O‘zbekiston–Xitoy munosabatlarini yanada mustahkamlash, shuningdek, mamlakatimiz bilan Gonkong o‘rtasidagi hamkorlikni yangi bosqichga olib chiqishga xizmat qilishi ta’kidlandi.

Muzokaralarda investitsiyalar, moliya, raqamlashtrish, sun’iy intellekt, transport va logistika sohalaridagi hamkorlikning istiqbolli yo‘nalishlari ko‘rib chiqildi. Tomonlar Gonkongning xalqaro moliya va biznes markazi sifatidagi tajribasi O‘zbekiston iqtisodiyotini modernizatsiya qilish va ilg‘or loyihalarni amalga oshirishda muhim ahamiyat kasb etishini qayd etdi.

Shuningdek, hududlararo sheriklikni rivojlantirish, ishbilarmon doiralar o‘rtasidagi to‘g‘ridan-to‘g‘ri muloqotlarni kengaytirish va qo‘shma tashabbuslarni ilgari surish masalalari yuzasidan fikr almashildi.

Uchrashuv yakunida O‘zbekiston va Gonkong o‘rtasida vizasiz rejimni joriy etish to‘g‘risidagi hukumatlararo bitimni tuzish niyati bo‘yicha verbal notalar almashildi. Qayd etilishicha, mazkur qadam fuqarolar uchun qo‘shimcha qulayliklar yaratish va o‘zaro almashinuvlarni faollashtirishga xizmat qiladi.