Екінші дүниежүзілік соғыстың аяқталғанына 81 жыл толды. Уақыт өткен сайын оның ащы тарихы мен адамзатқа әкелген орны толмас қасіреті ұмытылған жоқ. Керісінше, бұл ауыр естеліктер бейбітшілік пен тыныштықтың қаншалықты қымбат құндылық екенін үнемі еске салып отырады. 9 мамыр – Еске алу және қадірлеу күні осындай терең мәнге ие.

Мемлекет басшысы осы атаулы күнге орай ұйымдастырылған еске алу рәсіміне қатысты.

Дәстүр бойынша Президент Шавкат Мирзиёев «Матонат мадхияси» ескерткішіне гүл шоғын қойды. Бұл монумент соғыс жылдарындағы халықтың шеккен азабы мен қайсарлығын, сондай-ақ орны толмас қасіретті бейнелейді.

– Бүгінде ортамызда аман-есен өмір сүріп жатқан соғыс және еңбек ардагерлеріне, барша қарияларымызға ерекше құрметімізді білдіреміз. Бұл кешен Ұлы жеңіске үлес қосқан көпұлтты халқымыздың ерлігі мен батырлығын дәріптейтін қасиетті орын, – деді Мемлекет басшысы.

Мәліметтерге сәйкес, фашизмге қарсы соғыстарға сол кездегі 6 миллион 800 мың халқымыздың шамамен 2 миллионы қатысқан. Оның 540 мыңға жуығы қаза тапқан, 158 мыңы хабар-ошарсыз кеткен, 50 мыңнан астамы концлагерьлерде көз жұмған, ал 60 мыңнан астамы мүгедек болып оралған.

Өзбекстандық сарбаздар мен офицерлердің 214 мыңға жуығы ордендер мен медальдармен марапатталған.

Соғыс жылдары еліміз фронттың сенімді тылдық базасына айналып, майданға көп көлемде әскери техника, қару-жарақ, киім-кешек және азық-түлік жеткізілді. Ауыр жағдайға қарамастан, халқымыз соғыс аймақтарынан көшірілген 1,5 миллионға жуық адамды, соның ішінде 250 мың жетім баланы бауырына басып, қамқорлық көрсетті.

Іс-шараға Өзбекстан Қарулы Күштері, мемлекеттік және қоғамдық ұйымдар өкілдері, махалла белсенділері мен ақсақалдар қатысып, ескерткішке гүл шоқтарын қойды.

Президент Шавкат Мирзиёев сондай-ақ Жеңіс саябағындағы «Ұлт жанашырлары» аллеясында болып, тәуелсіздік жылдарында ел қорғау жолында қаза тапқан әскери қызметкерлер мен құқық қорғау органдары қызметкерлерінің рухына тағзым етті.

– Бір жыл бұрын осы жерде «Ұлт жанашырлары» кешенін салуымыз бекер емес. Бұл Отан қорғау әр ұрпақтың қасиетті борышы екенін және патриоттық дәстүрдің жалғастығын білдіреді, – деді Президент.

Кешенде тәуелсіздік жылдарында Отанымыздың азаттығы мен ел-жұртымыздың тыныштығы жолында ерлікпен қаза тапқан 196 әскери қызметші мен құқық қорғау органдары қызметкерлерінің есімдері мәңгіге қашалып жазылған.

Мемлекет басшысы осындай ержүрек, батыр ұлдарды дүниеге әкеліп, оларды шынайы отансүйгіштік рухта тәрбиелеген ата-аналарға шынайы ризашылығын білдірді.

Халқымыз жас ғұмырында ел үшін жанын пида еткен мұндай қаһарман ұлдарын ешқашан ұмытпайды. 2025 жылдың өзінде бұл кешенге 650 мыңға жуық отандасымыз бен шетелдік қонақтар зиярат жасаған.

Мұнда көптеген рухани-ағартушылық іс-шаралар, тарих пен патриотизмге арналған дәрістер, «Келешек сағаты» сабақтары өткізіліп келеді. Мұндай жұмыстардың тәрбиелік маңызы зор екені атап өтіліп, оларды жалғастыру қажеттігі айтылды.

Биыл ұлы қолбасшы Әмір Темір бабамыздың 690 жылдық мерейтойы елімізде және шетелдерде кеңінен аталып өтуде.

Сайыпқыран бабамыздың мемлекетшілдік, ерлік пен батырлық дәстүрі бүгін де өз жалғасын табуда. Бұл ұлы мұраны батыр сарбаздарымыз, офицерлер мен генералдар лайықты түрде жалғастырып келеді. Олардың елдің ең үлкен байлығы әрі Отанымыздың сенімді қорғаны екені атап өтілді.

– Бүгін осында сап түзеп тұрған «Темурбектер мектептері» оқушылары мен қайсар әскери қызметкерлеріміздің бейнесінен Алпамыс, Жалаладлин Мәңгіберді және Әмір Темірдің жаңа буынын көреміз. Ұлы бабаларымыздың бай мұрасы, ғылымы мен тәжірибесі тек музейлерде ғана емес, жүрегімізге қайта оралып жатыр. Олар бейне бір қайта тіріліп, Жаңа Өзбекстан мен Үшінші Ренессанс іргетасын бізбен бірге қалап жатыр. Ташкенттегі Ислам өркениеті орталығы, Темурилер тарихи мемлекеттік музейі, Самарқандтағы Имам Бұхари кешенін көрген әр адам мұны терең сезінеді, – деді Президент Шавкат Мирзиёев.

Атап өтілгендей, Отанды қорғау – мемлекет пен халық үшін ешқашан маңызын жоймайтын қасиетті міндет. Әсіресе қазіргі күрделі кезеңде оның өзектілігі еселене түсіп отыр.

Биыл еліміздің тәуелсіздігіне 35 жыл толуы кең көлемде аталып өтпек. Бұл маңызды дата «Біртұтас Отан, біртұтас халық болып, жаңа өмір мен болашақ құрамыз» деген ұран аясында қарсы алынуда.

– Бүгінде әлемнің түрлі аймақтарындағы қақтығыстар мен соғыстарды көріп отырмыз. Осындай күрделі жағдайда ұлттық бірлік пен ынтымақты сақтау – ең үлкен күш әрі басты байлық. Отанды қорғау – әлемдегі ең ұлы әрі мәртебелі іс. Бұл ақиқатты терең түсініп, әскери антына адал болып жүрген батыр ұлдарымызға қандай құрмет көрсетсек те лайық, – деді Мемлекет басшысы.

«Ұлт жанашырлары» аллеясы ерлік рухы мәңгі жаңғырып тұратын, бейбітшілікке үндейтін қасиетті орынға айналуы, мыңдаған, миллиондаған Отан қорғаушыларын тәрбиелеуге қызмет етуі тиіс екені атап өтілді.

Отан алдындағы борышын өтеу барысында ерлікпен қаза тапқан азаматтардың отбасылары мен балаларына жан-жақты қолдау көрсету жұмыстары алдағы уақытта да жүйелі түрде жалғасатын болады.