Маълум қилинишича, “Тошкент-Аэро” ихтисослаштирилган божхона комплекси тезкор тузилмалари ҳамда Давлат хавфсизлик хизмати ходимлари ҳамкорлигида ўтказилган тадбирда шубҳали юк аниқланган.
“Истанбул–Тошкент” рейси орқали келган йўловчи божхонадан “яшил” йўлак орқали ҳаракатланаётган вақтда текширувдан ўтказилган. Аниқланишича, у Туркияда нотаниш шахс илтимоси билан 35 АҚШ доллари эвазига сумкани Тошкентга олиб келган.
Божхона кўриги жараёнида сумка ичидаги ерёнғоқ қадоқланган пакет текширилганда, доналар орасига яширилган қизил рангли таблеткалар борлиги маълум бўлган.
Текширув натижасида “Marvel” ёзуви туширилган жами 598 дона таблетка MDMA синтетик гиёҳвандлик воситаси экани аниқланган.
Қайд этилишича, мазкур турдаги наркотик моддаларнинг қора бозордаги қиймати камида 15–20 минг АҚШ долларини ташкил қилади.
Ҳозирда мазкур ҳолат юзасидан божхона органлари томонидан текширув ҳаракатлари давом эттирилмоқда.
