Бу бўйича Ўзбекистон Республикаси Президентининг 2026 йил 4 августдаги «Алоҳида таълимга эҳтиёжи бўлган болаларни таълим ва ижтимоий хизматлар билан қамраб олиш тизимини такомиллаштириш бўйича қўшимча чора-тадбирлар тўғрисида»ги қарори қабул қилинди.

Қарор билан 2026–2028 йилларда алоҳида таълимга эҳтиёжи бўлган болаларни таълим ва ижтимоий хизматлар билан қамраб олиш тизимини такомиллаштиришга қаратилган янги чора-тадбирлар белгиланди.

Қарорга мувофиқ, 2026 йил 1 сентябрдан алоҳида таълимга эҳтиёжи бўлган болаларни таълим, ижтимоий ёрдам ва хизматларга жалб қилиш бўйича «оилабай» ишлаш тизими жорий этилади. Унда ижтимоий ходимлар ота-оналарга амалий кўмак кўрсатади ва болаларнинг таълим ҳамда ижтимоий хизматлардан фойдаланишини мунтазам мониторинг қилиб боради.

Шунингдек, 3–18 ёшли болаларнинг алоҳида таълимга эҳтиёжи «Инсон» ижтимоий хизматлар марказларининг махсус баҳолаш гуруҳлари томонидан аниқланади. Бу тизим дастлаб 2026 йил 1 октябрдан Навоий ва Хоразм вилоятларида йўлга қўйилади.

Қарор билан 2027 йилдан алоҳида таълимга эҳтиёжи бўлган болаларни ассистив жиҳозлар билан таъминлаш учун ваучер тизими, ногиронлиги бўлган абитуриентларга кириш имтиҳонларида қўшимча вақт бериш, Брайл алифбоси ва аудио форматдаги имтиҳон материалларидан фойдаланиш имконияти жорий этилади. Шунингдек, мактабларда кўзи ожиз педагоглар учун шахсий ассистент ва айрим тоифадаги ўқувчилар учун ассистент-ўқитувчи штатлари ташкил этилади.

Қарорга мувофиқ, нодавлат таълим ташкилотларида коррекцион синфлар учун субсидиялар, «Инклюзив таълим муҳити» грантлари, шунингдек, ногиронлиги бўлган шахсларнинг таълим ва касбий салоҳиятини ривожлантиришга қаратилган танловлар ва грантлар ҳам йўлга қўйилади.