Қонун билан Оила кодексининг 69-моддасига отанинг исмини болага фамилия сифатида бериш бўйича ўзгартириш киритилмоқда.
Амалда боланинг фамилияси ота-онанинг фамилиясига қараб белгиланади. Шунингдек, ота ёки она томонидан миллий анъаналарга кўра бобонинг исми фамилия сифатида берилиши мумкин.
Сенаторларнинг таъкидлашича, отанинг исмини болага фамилия сифатида бериш имкониятининг қонунчиликда белгилаб қўйилиши фуқароларга қўшимча қулайликлар яратади ҳамда миллий ва диний анъаналарга мувофиқ уларнинг хоҳиш-истакларини рўёбга чиқаришга хизмат қилади.
Шунингдек, қонун билан «Лицензиялаш, рухсат бериш ва хабардор қилиш тартиб-таомиллари тўғрисида»ги Қонунга «Бизнесга лицензиясиз кириш» махсус режими янги ҳуқуқий институт сифатида киритилмоқда.
Ушбу институт орқали келгусида айрим фаолият турлари билан уч ойгача лицензия ёки рухсатномасиз шуғулланиш имконияти яратилади.
Бунда тадбиркорлик субъектлари лицензия ёки рухсатнома олмасдан туриб, электрон тарзда ваколатли органни хабардор қилиш орқали ўз фаолиятини бошлаши мумкин бўлади.
Бу уларга лицензия ёки рухсатнома талабларига мослашиш учун қўшимча вақт, шунингдек, ўз фаолиятини синов тариқасида бошлаб, унинг иқтисодий самарадорлигини баҳолаш имконини беради.
Таъкидланишича, мазкур ўзгартиш тадбиркорлик фаолиятини бошлашни енгиллаштиради, вақт ва харажатларни тежайди ҳамда янги бизнес ташаббусларини рағбатлантиришга хизмат қилади.
Бундан ташқари, қонун билан «Архив иши тўғрисида»ги Қонунга архив иши соҳасидаги ваколатли давлат органларининг ваколатларини аниқлаштирувчи, нодавлат архивлари ва электрон архивларни ташкил этишга доир қоидаларни ҳамда архив ҳужжатларини идоравий архивларда вақтинча сақлаш муддатларини белгилайдиган ўзгартиришлар киритилмоқда.
Қизғин муҳокамалар якунларига кўра, қонун сенаторлар томонидан маъқулланди.
