Ўзбекистон миллий терма жамоаси аъзолари номини тилдан қўймай такрорлаётган ва уларга тақлид қилаётган турли давлатлардаги футбол ишқибозлари, байроғимизни елкасига ёпиб, мундиал ўтаётган шаҳар кўчаларида жамоамизни қўллаб-қувватлаётган турли миллат вакиллари, ўзбек спортчиларига атаб қўшиқ айтаётган қардош озарбайжон, қозоқ ва турк санъаткорлари... Санайверсак, адоғи кўринмайди.
Ҳа, Ўзбекистон миллий терма жамоаси футбол тарихида янги саҳифа очди. Жамоамиз ЖЧ — 2026 даги тарихий дебют учрашувини ўтказди. Мексика пойтахтидаги Колумбия мухлислари билан тўлиб-тошган, сариқ рангга бурканган Ацтека стадионида футбол бўйича XXIII жаҳон чемпионатининг “K” гуруҳи биринчи тур учрашуви бўлиб ўтди. Англиялик таниқли ҳакам Энтони Тейлор бошқарган баҳс колумбияликлар фойдасига 3:1 ҳисобида якунланган бўлса-да, жамоамиз мундиал тарихидаги илк ўйинида кучли рақибга муносиб қаршилик кўрсата олди.
Эътиборли жиҳати, Аббосбек Файзуллаев киритган гол Ўзбекистон миллий терма жамоасининг жаҳон чемпионатидаги илк голи сифатида тарих саҳифаларига қайд этилди. Шу тариқа Аббосбек миллий футболимиз солномасига ўз номини муҳрлаб қўйди.
Мундиаллар тарихида кутилмаган натижалар жуда кўп учрайди. Ҳатто амалдаги чемпион сифатида майдонга тушган жамоалар ҳам биринчи ўйинда кутилмаганда мағлубият аламини тотганига мисоллар етарли. Мутахассислар таъбири билан айтганда, Ўзбекистон жаҳон чемпионатида дебютант жамоа. Унинг илк рақиби — FIFA рейтингида 16-ўринни эгаллаб турган Колумбия миллий термаси. Шунга қарамай, ватандошларимиз мухлислару мутахассисларда илиқ таассурот қолдирди. Ҳар қандай рақибга қарши туриш, гол уриш, у билан тенгма-тенг тўп суриш мумкинлигини, ҳатто янада яхши натижага эришиш имкони борлигини намойиш қилди.
Айниқса, ўйиндан кейин давлатимиз раҳбари билдирган фикрлар олдинда бизни кутаётган қизғин ўйинлар арафасида спортчиларимиз учун катта қувватлов бўлди. Президентимиз миллий терма жамоамизнинг иштирокини юқори баҳолади.
— Бу Ўзбекистон учун тарихий кун. Муросасиз, жуда қизғин кечган ўйинда футболчиларимиз жаҳон мундиалида биринчи марта жуда катта тажрибали жамоага қарши кучли характерини кўрсатди. Бу осон эмас. Биз 34 йил кутган воқеа бўлди. Йигитларимиз кучли характери, жисмоний тайёргарлиги ва иродасини яққол намоён этди. Биз учун биринчи жаҳон чемпионатида биринчи голимиз — бу ҳам ғалаба.
Биз ватанпарвар ва фидойи ёшларимиз билан ғурурланамиз. Улар янги Ўзбекистоннинг ҳақиқий қаҳрамонлари. Ҳали олдимизда жуда кўп имкониятлар бор. Фарзандларим, қаҳрамонларимиз кўп нарсага қодир эканликларини намойиш қила олишди. Уларга омад ёр бўлсин! Олға, Ўзбекистон! — деди давлатимиз раҳбари.
Терма жамоамиз бош мураббийи Фабио Каннаваро ўйиндан сўнг матбуот анжуманида билдирган фикрлар ҳам диққатга сазовор:
— Футболчиларимдан ғурурланаман. Улар яхши ўйнади. Бугун қийин баҳс кечди. Бундай стадионда, бундай мухлислар қаршисида ўйнаш осон эмас. Лекин бу кўпроқ мотивация бериши ҳам мумкин. Учрашув қизиқарли ўтди. Иккинчи бўлимда биз ўйинни ўзгартиришга эришдик. Чап қанотдан имкониятлар яратдик. Назоратни ўз қўлимизга олишга ҳаракат қилдик, бироқ гол ўтказиб юбордик. Мен доим жамоамга ўйин давомида фаол ҳаракат қилиш кераклигини айтиб келаман. Колумбия сингари кучли жамоаларга қарши ўйнаш катта куч ва маҳорат талаб қилади. Биз ушбу ўйинни эслаб қоламиз. Чунки бу тарихий беллашув. Биз жаҳон чемпионатидамиз. Бугунги ўйин биз учун яхши бўлди деб айта оламан. Хатолар бор, улар устида ишлаймиз.
Шу ўринда Колумбия терма жамоаси бош мураббийи Нестор Лоренсонинг Ўзбекистонга қарши ўйиндан кейин айтган сўзларига ҳам қулоқ тутсак: “Мундиалда заиф жамоанинг ўзи йўқ. Шу боис, ҳар қандай рақибга ҳурмат билан муносабатда бўлиш керак. Ўзбекистон терма жамоаси сўнгги йилларда жуда яхши натижаларга эришган. У жуда яхши ташкил этилган жамоа. Таркибида маҳоратли футболчилар ва кучли мураббий бор. Ўзбекистон терма жамоаси қай тарзда футбол ўйнашни яхши билади”.
Энди Фабио Каннаваро бошчилигидаги миллий терма жамоа иккинчи тур доирасида Португалияга қарши майдонга тушади. Учрашув 23 июнь куни Тошкент вақти билан соат 22:00 га белгиланган.
Дарвоқе, Мексика оммавий ахборот воситалари кечаги ўйиндан кейин Ўзбекистон жамоаси аъзолари характеридаги қизиқ жиҳатга эътибор қаратди. Гап шундаки, йигитларимиз жаҳон чемпионатидаги илк учрашувга мезбонлик қилган Мексика ва афсонавий Ацтека стадионига миннатдорлик сўзларини ёзиб қолдирди. Жамоа кийиниш хонасидаги махсус доскага испан тилида “Muchas gracias, México! Mucha suerte en el Mundial!” (Катта раҳмат, Мексика! Жаҳон чемпионатида омад тилаймиз!) деган сўзлар ёзилган. Ёзув охирида ўзбекча “Раҳмат!” сўзи ҳам қўшиб қўйилган.
Сизларга ҳам раҳмат, йигитлар! Гуруҳ баҳсларида омад ёр бўлсин! Олға, Ўзбекистон!
Нодир МАҲМУДОВ,
“Янги Ўзбекистон” мухбири
