Унга кўра, Ўзбекистон эркаклар ўртасидаги Жаҳон кубогига йўлланма олган мамлакатлар рўйхатида биринчи ўринни эгаллади. Аёллар ўртасидаги Жаҳон кубогига эса Ўзбекистон 13-ўриндан жой олди.
FIDE маълумотига кўра, Олимпиада натижалари асосида эркаклар ўртасидаги мусобақа учун 83 та миллий федерация, аёллар ўртасидаги мусобақа учун эса 45 та федерация йўлланмага эга бўлди.
Европа, Африка ва Америка қитъалари федерациялари ўзларига ажратилган айрим йўлланмаларни қитъа чемпионатларига ўтказишга қарор қилган. Шу сабабли эркаклар ўртасидаги мусобақа учун 17 та, аёллар ўртасидаги мусобақа учун эса 5 та йўлланма қитъа мусобақаларига йўналтирилган.
Ҳар бир миллий федерация Жаҳон кубогида иштирок этадиган шахматчини Самарқанддаги Олимпиадада қатнашган ўз жамоаси аъзолари орасидан танлайди.
Агар жамоанинг барча аъзолари бошқа саралаш йўллари орқали мусобақага йўлланма олган ёки иштирок этишдан бош тортган бўлса, федерация мазкур ўринни бошқа шахматчига бериш ҳуқуқига эга.
Миллий федерациялар ўз вакилларини 2027 йилнинг 1–15 июль кунлари оралиғида тасдиқлаши кутилмоқда.
